कमिशन बिना नो वरदान

# हृदयप्रसाद मिश्र

दँय्दसें थें थुगुसी नं बजेट भाषण जुल । बेरोजगारतय्त ज्या दइगु । बेघरपिंत घर दइगु, अले गरिबतसें याउँक म्वाना नयेफइगु नीति सरकारं हइगु धयागु लोभं देगलय् निम्ह निखे सिंह पिवाः च्वनी थें जि नं टिभीया न्ह्यःने ग्वारामारा चिनाः धुकुक्क धायेक फ्यतुना । गणतन्त्रया ई फुक्कं नेतात पार्टीत समृद्ध नेपाः दयेकेगुली जिपिं लगे जुइधुन धाःगुलिं थ्व पालय् अवश्य नं सरकारं जनताया हीत जुइगु सर्वसाधारणं नं म्वानाः नयेफइगु नीति हइ जुइ धकाः भतिं छुँयात ताखे याइथें मिखा हे फुतिक्क मयासे टिभीयात स्वयाच्वना ।

अर्थमन्त्रीं खरबौं बजेटया भाषण यात, सांसद, मन्त्रीतसें तार्रर लापा थात । तर टिभी स्वयाच्वनाम्ह जि धाःसा भज्यंक द्यात । सदां थें तुं सरकारं महंगीया विकास जुइगुली आपाः ध्यान बिउगु खनेदत । कर्मचारीया तलब बढे जुल । कर्मचारीत मख्ख जुल, मेपिनि मूड अफ जुल । मूड अफ याइपिंलय् जिं थःत फस्र्टब्वाइ तायेका । तर छु याये फस्र्ट जूसां सिरपाः धाःसा ल्वाप्पा जक जुल ।

वइवइपिं फसिक्वाः धाःथें ‘नेतात जनतामारा, नीति गरिबमारा’ जूगुलिं दिक्क जुयाः सितिकं लाःगु हावा नये धकाः छेँ नं पिहां वना ।
थ्वाथः भ्वाथःगु सडक जूसां न्यूरोडय् थ्यनेवं श्वेतभैरव हे माथ जुइकथं स्वीनिपुं हे वा क्यनाः वास्यावास्या न्हिन्हिउं वःम्ह जिमि पासा नगदराम नापलात । नापलायेसातकिं हे च्या त्वनेगु मखुला धकाः न्यन ।

मेबलय् जूसा त्याङग्रा पुलेगु छता बाहेक मेगु पुलेगु धालकि सदां ल्वःमनेगु बानी दुम्ह पासां थौं च्या त्वनेगु मखुला धाःगु न्यनाः घौपलख ला जितः म्हगसय् म्हंगु जकं खः ला धयाथें जुल । थःत कुतिं न्यानाः स्वयाबलय् स्यासेलिं पक्कापक्की हे म्हगसय् मखु धयागु ग्यारेन्टी जुल । अले जिगु म्हुतुं जिं हे मचायेक प्याट्ट धायेक बोली पिहांवल ।

छाय्, छुकिया लसताय् ? जिगु न्ह्यसः हे पूवने मलाःनि जिम्ह पासां काचाक्क धायेक लिसः बिल । तलब बढे जूगुया लसताय् का । बजेट भाषण मन्यनाला छं ?तं पिहांवःगु स्वयेबलय् ला छिमांया छ्यं बढे जुयाः छाय् लय्तायेमाःगु धकाः धाये मास्तिवःगु खः । अय्नं जिगु म्हुतुया सः स्टप जुयाबिउगुलिं बचे जुल का । मखुसा ला जिमांया छ्यं ग्व बढे जूगु ?

जि बुसांनिसें व हे छगः ला खःनि, उकिसं फसिथें जिमांया छ्यं तःग्वः जुयावःगु छंगु हथं मिखां खं ला धकाः डायलग नकीगु जुइ वं । तै बचे जुल का धकाः जिं बिचाः यायेत मिखा हे तिस्सिइ मलाःनि साइकल पन्चट जुइबलय् टायरया सः थें नगदरामं प्याट्ट सः थ्वयेकल । छाय् जिमि तलब बढे जुयाः छं नुगः मुल ला ? नत्र बढे जूगु प्रगति उन्नति जूगु धइगु ला बांलाःगु हे खँ खःनि ।

का छन्त धन्यवाद का न्हैं । छं च्या त्वनेमखु धाल । गुकिं यानाः जिगु नीर्का दां नं बचे जुल । का आःयात जि वने, कलाःचित नं थ्व तलब बढे जूगु शुभसमाचार कनेमानि धयाः लगाम मदुम्ह सल थें बेतोडं ब्वाना हे छ्वत ।मेपिनि थुक्पा नइ, जि धाःसा थः हे कलाःयात चुप्पा छक्वः नयेत स्वलकि हे ५००० भोल्टया करेन्ट वइ । भाजनय् कःनि मुइकेगु हैसियत तकं मदयाः कलाःया न्ह्यःने वनेत जोशी क्यनाः जक वनेमाः थें च्वंगु अवस्था । थज्याःगु विडम्बनाया इलय् जितः नुगः मुल ला हँ का ।

जिगु नुगः बारा खः ला व मुइत । कि आय्टम बम धकाः च्वन व झतिंगर नगदरामं । थःके नगद मदु । सदां हावाराम जुया च्वनेमाल का । व जाग्वारा नगदरामया जकं तलब बढे जुल का । झी जागीर मदुपिं कर्मचारी मखुपिंत ला महंगी जकं बढे जुल का । हाकनं थ्व महंगी थुलि याकनं लागु जुइ कि अहोऽ । बजेट भाषण सिधये हे मलावं हे लागु जुइ धयां ।

चिनिइ न्यार्का दां बढे जुल धाःसा अर्थमन्त्रीया भाषण हे पूवने लाइ मखुनि, पसलय् चिनी न्याःवनेबलय् न्यार्का बढे यानाः हे काइ । छाय्, गुबलय् बढे जूगु हाइँ धकाः न्यन धाःसा बजेट भाषण मन्यना ला छं धकाः अःखःबतं न्ह्यसः न्यनीगु धयां । हाकनं चिनिइ न्यार्का दां घटे जुल धाःसा कन्हय्कुन्हु चिनी न्याःवंसां हे पुलांगु हे भाः काइ ।

अले टिभीं ला न्यार्का घटे जुल धाःगुनि धाःसा अय्सा टिभीइ हे न्याः हुँ धकाः जवाः बियाहइगु । मारय् झी धकाः लाइगु । कागलाई बेल पाक्यो हर्ष नि विस्मात धाःथें थः ला कर्मचारी हे मखु । अले यत्रो धकाः लय्तायेगु ला ?जितः ला अय्क स्वयेबलय् झीगु देय्या सरकार हे बेरोजगार थें च्वना वयेधुंकल धयां । मेगु छुं ज्या मन्त अले दँय् छक्वः सुइँसुइँ तलब बढे याइ ।

तलब बढे जुलकि स्पीड नक्सां महंगी नं बढे जुइ, सर्वसाधारणयात थाकुइ धयागु खँ सरकारया जासिइ गय् जा बुइ मफुगु जुइ । थ्व ला कर्मचारी बाहेक मेपिनि निंतिं ला तःधंगु हे अन्यायया खँ जुल । थःत थम्हं एकसे एक जुजु भाःपिया च्वंपिं नेतातसें नेपाःमितय् मर्का छु थुइ धकाः । झूलया पिनें पति हाःथें का । जनताया सःयात ला वास्ता हे याइगु मखु धयां ।

आः छु यायेगु काऽऽ । थ्व पार्टीपति पिर्टीपति तयेत धयांमजिउ । आः थ्व समस्या मेपिंसं ज्यंके फइमखु । मात्र व हे ह्याण्डसम भैरव छम्हेस्यां जक फु । अन हे वना । थुगुसी झं म्ह्याय्या ब्याहा न्याः धयां । महंगीं यानाः ब्याहाः हे याकी थें मच्वने धुंकल । मेपिं नेवाःतसें थें जिं नं बुँ छकू मियाः ज्याखँ सिधयेके त्यनागु, अय्नं हे ध्यबा गाइ थें मच्वने धुंकल ।

उकिं आः महंगी नियन्त्रण यानाबिज्याहुँ धकाः वहे प्रभु कालभैरव यानेकि ह्याण्डसम भैरबयात रिक्वेस्ट याये धयागु मतिं न्यार्कावंगु प्यारा छगः गिफ्ट ज्वनाः पलाः न्ह्यज्याका । श्रद्धापूर्वक गिफ्ट लःल्हायेधुनेवं निप्पां तुति भागी यानाःलि ल्हाः निप्पां दोहलपा जिं ह्याण्डसम भैरबया न्ह्यःने थःगु माग न्ह्यब्वया । प्रभुऽऽ सरकारं खालि कर्मचारी, नेता ब्यापारीतय्त जक ध्यान बीगु ।

थुगुसी नं सदां थें तलब बढे यात । कर्मचारीया तलब बढे जुलकि बजारय् अटोमेटिक महंगी बढे जुइगु । जिपिं थज्याःपिं बेकारितसें ला म्वानाः नये फइगु हे अवस्था मन्त । झं थुगुसी ब्याहा न्याः प्रभु । थथेभनं महंगी बढे जुलकि ला गथे यानाः ज्याखँ पुवंकेगु जिं । उकिं न्ह्याथे यानाःसां जिमि सरकारं याये मफुगु महंगी नियन्त्रणयात छःपिंसं यानाबिज्याये माल प्रभु ।

बेसाः भाः दनकि जिं नं याउँक ज्या सिधयेके खनी । थुलि कृपा तयाबिज्याहुँ प्रभु धकाः बिन्ति याना । जिगु बिन्ति न्यनाः धन्दा कायेम्वाः, जिं छंगु मनसुवाः पुरे यायेत महंगी नियन्त्तण यानाबी धाइ धकाः च्वनां ला गन अथे जू धकाः । अःखःबतं थःगु ग्वग्वलाःगु मिखायात अझं ततःग्वयेकाः कालभैरव ला बम्के धकाः जुयाहल । दकलय् न्हापां म्वानाः नये फइगु हे अवस्था मन्त धकाः छं धाःगु खँ हे गलत ।

फुकस्यां म्वानाः हे नइगु खः । सी धुंकाः नइमखु । छिमि नेतामन्त्रीतसें म्वानाः हे मज्जां माकुक नयाच्वंगु मखुला ? दुइ नम्बर, छंगु म्ह्याय्या इहिपा यायेत गुलि खर्च जुइ धा सा । जिं काचाक्क धायेक १५÷२० लाख ति खर्च जुइ प्रभु धया । अय्सा १५ लाखया १ प्रतिशत गुलि जुइ ? झिंन्याद्वः जुइ प्रभु । अले छं जितः साइनिङ एमाउन्ट कथं हःगु प्यारा जम्मा न्यातका वंगु ला ?

थौंकन्हय् जिं बरदान बिइबलय् १ प्रतिशत कमिशन मदयेकं मबिया । कय्तापूजाया खर्चय् १ प्रतिशत, इहिपा ब्याहालय् बागू प्रतिशत, छेँ बुँ न्यायेगु मिइगु खँय् दुई प्रतिशत । जागीर मिले यायेगु, चुनावय् त्याकेगु बरदान चाहिँ ५ प्रतिशत कायेगु यानाच्वनागु दु । का छंगु बुँ मिइगु बरदान कायेत दुई प्रतिशत कमिशन बीगु खः कि मखु ?

भगवानं नापं कमिशनया खँ ल्हाःगुलिं जिं अजू चायाः तीजक बिन्ति याना, ‘अहो प्रभु छपिंत नं कमिशन ला ? कालभैरव झं तंचायाः तसलं धयाबिज्यात, ‘बिना कमशिन नो वरदान’ थुल ला छं ? नेपाःया नेतातसें यानाः द्यःतसें तकं कमिशन माग याःगु खनाः वाताहां च्वनाः झ्वाताहां दनाम्ह दंगु दनाः हे जुल धयां ।