असनय् भिंतुना बसन्त उत्सव न्ह्यानाच्वन

येँ – थनया असं दबुली भिंतुना बसन्त उत्सव न्ह्यानाच्वंगु दु । भिंतुना गुथिया ग्वसालय् न्याक्वःखुसी बसन्त उत्सव जुयाच्वंगु खः । उत्सवय् असं बाजं गुथि पाखें दाफा, अन्नपूर्ण ज्ञानमाला भजन खलःपाखें भजन न्यंकेधुंकूगु दु ।

ज्याझ्वःया उलेज्या असंत्वाःया थकालि १०४ दँ दुम्ह मोतिकृष्ण तुलाधरं यानादीगु खः । गुथिपाखें वय्कःयात दोसल्लां न्ययेकाः हनापौ नं देछाःगु खः । अथेहे ज्याझ्वलय् येँ महानगरपालिका २५ वडाया अध्यक्ष नीलकाजी शाक्य व २७ या अध्यक्ष चिनियामान वज्राचार्ययात नं हनेज्या यासें वय्कःपिनि कार्यकाल सफलताया निंतिं भिंतुना देछाःगु दु ।

भिंतना बसन्त उत्सवया झ्वलय् आः थीथी हुलाप्याखं, ख्यालः, भजन न्ह्यब्वयेगु निसें कविता न्यंकीगु ज्याझ्वः दु । ज्याझ्वः बहनी साढे ७ बजे तक न्ह्याइगु खँ धाःगु दु ।