सक्कलि सिसिइ नक्कलि अय्लाः

येँ(नेपालभाषा टाइम्स)- स्वनिगलय् सक्कलि सिसिइ नक्कलि अय्लाः तयाः मीपिनिगु छगू गिरोहयात ज्वंगु दु । जिल्ला प्रहरी परिसर येँय् नं नक्कलि अय्लाः दयेकाः सक्कलि सिसिइ तयाः मीगु गिरोहयात ज्वंगु खः ।

लिपांगु इलय स्वनिगःया होटल, रेष्टुरेण्ट, क्लब, डान्स बार, पब, दोहरीइ आदि थासय् थीथी ब्राण्डया सक्कलि सिसिइ नक्कलि अय्लाः मियाच्वंगु धइगु खुलासा जुइवं प्रहरीं थःगु सक्रियता अप्वयेका हःगु खः । उगु गिरोहं पुलांगु स्टकया सामान धकाः सक्कलि ब्राण्डया सिसिइ नक्कलि अय्लाः तयाः बजाः मू स्वयां झिंन्यासः निसें निद्वः तका दंगु भावं अय्लाः मिया वयाच्वंगु खँ सी दुगु दु ।

जिल्ला प्रहरी परिसं थुकथं नक्कलि अय्लाः दयेका मीगु ज्याय् संलग्न गिरोहयात हे ज्वंनाः अनुसन्धान न्ह्याकूगु दु । प्रहरीं द्वाल्खाया कालिन्चोक छेँ जुयाः येँय् च्वना वयाच्वंम्ह हरि ओली, उगु हे जिल्लाया भिमेश्वर नगरपालिका छेँ जुयाः येँय् च्वनाच्वंम्ह भगवान बस्नेत, येँया महाबौद्धय् च्वंम्ह विशाल ओली, रामेछापया मनोज खत्री व थँबहीया गोपी श्रेष्ठयात प्रहरीं ज्वंगु खः ।

थुगु गिरोहं कोटेश्वरय् नक्कलि अय्लाः उत्पादन यानाः थीथी ब्राण्डया नामय् विक्री वितरण याना वयाच्वंगु धइगु सुचंया लिधंसाय् प्रहरीं खोजतलास याःगु इलय् ओलीयात नियन्त्रणय् काःगु खः । ओलीयात नियन्त्रणय् कायेवं वयागु हे बयानया लिधंसाय् मेपिंत नं ज्वंगु खः ।

प्रहरीं नक्कलि अय्लाः उत्पादन याना वयाच्वंगु थासं शिलबन्दी यानाः बजारय् छ्वयेत तयारी अवस्थाय् तयातःगु सलंसः सिसि अय्लाः, खालि सिसि, आन्तरिक राजस्व विभागया स्टिकरलिसें अय्लाः दयेकेत प्रयोग जुइगु कच्चा पदार्थ, हलंज्वलं व थलबल नं बरामद याःगु दु ।
ज्वंपिंत कालोबजारी, सामाजिक अपराध व सजाय ऐन अन्तर्गत जिल्ला प्रशासन ज्याकूपाखें म्याद थप यानाः अनुसन्धान यानाच्वंगु दु ।

सम्बन्धित बुखँ

LEAVE YOUR COMMENTS