जिगु मिखाय् त्रिपिटक–अनुवादक दुण्डबहादुर

सुं नं व्यक्तिया सफलता वयागु दूरदर्शिता ९ख्ष्कष्यल० य् निर्भर जुइ । थज्याःम्ह व्यक्तिं याइगु ज्यां समाजय् तःधंक सकारात्मक योगदान बिइ । थुकिया बांलाःगु दसु त्रिपिटक–अनुवादक पाजु दुण्डबहादुर वज्राचार्य खः । थौं वसपोलया दूरदर्शी त्याग तपस्याया फलस्वरुप नेपाःया बुद्धशासनया ख्यलय् सकारात्मक प्रभाव खने दयावःगु दु ।

थ्व तसकं लसताया खँ जुल ।धर्मग्रन्थ मदयाः धर्मया मूखँ मसियाः गथे थःत ताल, वा यल अथे हे धर्मया व्याख्या यानाच्वंथाय् वसपोलया याकः कुतलं धर्मया प्रामाणिक मूल ग्रन्थत नेपालभाषां पिकयाः क्यनाबिइत ताःलाःगु दु । बुद्धशासन सबल यायेत थ्व छगू ऐतिहासिक योगदान नं खः ।

धर्मया मू ग्रन्थ अध्ययन व अभ्यास याइपिंत विपुल साधन उपलब्ध यानाब्यूगु दु । बुद्ध जन्मभूमि नेपालय् बुद्धया खँ मसीका च्वनेगु तथा विदेशी लेखकतय्सं च्वयातःगु सपूm ब्वनाः परनिर्भर जुयाच्वंथाय् थःगु हे मातृभाषां ब्वनेगु व अभ्यास यायेत अवसर चूलाःगु दु । छुं दँ लिपा वसपोलपाखें पिदनेत्यंगु त्रिपिटक व उकिया आधारय् लिपा सृजना जुइगु वाङ्मय साहित्य भण्डार नं झीके विपुल जुइगु जुल ।

थुकिं झीथाय् मौलिक बुद्ध–धर्मयात यथार्थकथं खंकाः सिइकाः उकियात चिरस्थायी याना तयेत थुकिं छगू तःधंगु तिबः जूवनी ।नेपालभाषायात विश्वय् थीथी आधारय् म्हसीका बिइगु साधनमध्ये त्रिपिटक व शब्दकोष नं खः । थज्याःगु साधन गुलि झीके दत झीगु भाषा उलि हे धनी जुइ । छुं जुयाः नेपालभाषा ल्हाइपिं मदयावंसा त्रिपिटकया भाषाया माध्यमं नेपालभाषायात हाकनं म्वाका हये फइगु साधन विश्वय् ल्यनाच्वनी ।

झीथाय् गुरुजन, भिक्षुपिं, अनागारिका लगायतयापिंत जक मखु, थीथी सामाजिक, आर्थिक, राजनैतिक ख्यलय् उच्च पदय् नेतृत्व तहलय् आसिन जुयाच्वंपिं महानुभावपिंत बुद्ध–शिक्षा ब्वंकाः थुकिं सकारात्मक सोच व विचारय् परिवर्तन हये फइगु यक्व सम्भावना दु । विश्वया ततःधंगु विश्वविद्यालयय् त्रिपिटक सम्बन्धी उच्चस्तरय् अनुसन्धान यानाः देश विकासया मूल पूर्व आधारय् व्यापक फेरबदल यानाच्वंगु दुगु जुल ।

नेपाली समाजया तीव्रतर विकास व भलाई यायेगु खःसा थुगु क्षेत्रय् झीसं नं बिचाः याये माःगु हथाय् जुइधुंकल ।धर्मया खँ धर्म कनीपिनि म्हुतुं पिहां वयेकाः अले जक न्यने धकाः पिइ म्वायेक, थम्हं हे ब्वनाथें आचरण व अभ्यास यायेफत धाःसा जीवनया अन्तिम लक्ष्य निर्वाण थः लिक्क सतिना वइ । थ्व कम उपलब्धिया खँ मखु ।

भाजु दुण्डबहादुर वज्राचार्य थ्व हे आधारय् निरन्तर न्ह्याःवनाच्वंगु दु । वसपोल छम्ह व्यक्ति जक मजुसे छगू धिसिलाःगु संस्था नं खः । झण्डै ४० दँ निसें छगू हे क्षेत्रय् महान लक्ष्य तयाः गुगु ज्या यानाच्वन, थ्व छगू अतुलनीय योगदान खः, विश्वया दुर्लभ घटना खः, छगू आदर्श नमूना नं खः । मानव जीवनया मूल्य थूपिंसं जक थःगु लक्ष्य अनुसार ज्या यायेफइगु जुयाच्वन ।

वसपोलं थःगु बुद्धि व साधन स्रोत छ्यलाबिज्यात । थ्व वसपोलयाके दुगु निःस्वार्थ त्याग खः । थुकथं हे त्रिपिटक अनुवादया महान लक्ष्यसहित भावी योजनायात अनवरत रूपं न्ह्याका यंकावं च्वने फयेमा धकाः आसिकाया नापं वय्कःया भिंउसाँय्, ताःआयु व मंगलमय कामना यानाच्वना । अस्तु ।

सुश्री सविता धाख्वा शाक्य