किपुया मेयरय् एमालेपाखें डा. मानन्धर उम्मेदवार

येँ (नेपालभाषा टाइम्स)- नेकपा एमालें किपू नगरपालिकाया मेयर पदय् डा. सुरेन्द्र मानन्धरयात थनीगु जूगु दु । एमालेया येँ जिल्ला कमिटीया बुधवाः च्वंगु बैठकं मंसिर १६ गते जुइत्यंगु उपचुनावया निंतिं येँ दुने लाःगु प्यंगुलिं स्थानीय तहया उम्मेदवारत क्वःछिउगु खः । बैठकं किपूया मेयर पदय् डा. मानन्धरया लिसें १ वडाया अध्यक्षय् हर्ष महर्जन व ४ वडाया अध्यक्ष बद्री बुढाथोकीयात थनेगु क्वःछिउगु दु । अथेहे येँ महानगरपालिका १६ वडाया अध्यक्षय् लक्ष्मीरत्न तुलाधरयात थनीगु जूगु दु ।

माओवादी केन्द्रपाखें किपूया मेयरय डा. शिवशरण महर्जनयात थनेगु क्वःछीधुंकूगु दुसा राप्रपापाखें इन्जिनियर धु्रव महर्जनयात थनीगु जूगु दु ।
किपु नगरपालिकाय् कांग्रेसपाखें निर्वाचित मेयर राजकुमार नकर्मी मदुगुलिं पद खाली जुयाच्वंगु खः । निर्वाचन आयोगं मंसिर १६ गते जुइगु निर्वाचनया निंतिं मंसिर २ गते उम्मेदवारी दर्ता यायेगु ज्याझ्वः क्वःछिनातःगु दु ।