पाल्पाया रामपुरय् नेवाः सांस्कृतिक संग्रहालय

येँ(नेपालभाषा टाइम्स)- पाल्पाया रामपुरय् नेवाः समुदायया कला संस्कृति ल्यंकेगु ल्यखं नेवाः सांस्कृतिक संग्रहालय निर्माणया ज्या न्ह्याकूगु दु । नेवाः समाज रामपुर पाल्पां रामपुर नगरपालिकाय् नेवाः समुदायया कला, संस्कृति ल्यंकेगु ल्याखं नेवाः सांस्कृतिक संग्रहालय निर्माणया ज्या न्ह्याकूगु खः ।

समाजं रामपुर नगरपालिका ४ वडाया गैराबारीइ नेवाः सांस्कृतिक संग्रहालय निर्माण यायेत्यंगु खः । समाजया नायः बाबुराम श्रेष्ठं करिब छपी जग्गाय् स्वतँ जाःगु भवनलिसें संग्रहालय निर्माण यायेत्यनागु जानकारी बियादीगु दु । संग्रहालयय् न्हू पुस्तायात नेवाःतय् मौलिक, पुलांगु कला, संस्कृति रीतिरिवाज, नखःचखः आदिया बारे जानकारी बीगु ल्याखंया ज्वलंत ब्वयेगु ल्याखं संग्रहालय निर्माण यायेत्यनागु नायः श्रेष्ठ कनादिल ।

संग्रहालय निर्माण निंतिं संघीय सरकार व प्रदेश सरकारपाखें बजेट तकं विनियोजन यायेधुंकूगु दु । नायः श्रेष्ठया कथं निगू चरणय् संरचना निर्माण क्वचायेकेगु योजनालिसें संग्रहालय निर्माणया ज्या न्ह्याकूगु दु । न्हापांगु चरणय् संघीय सरकारपाखें विनियोजन जूगु १८ गू लख व स्थानीय जन श्रमदानपाखें यानाः २१ गू लख झिंन्हय्द्वः तका बराबरपाखें भवन निर्माणया ज्या जुइ । अनंलि निगूगु चरणय् लुम्बिनी प्रदेश सरकारपाखें विनियोजन जूगु २५ गू लख दाया ज्या ठेक्कापाखें जुइगु समाजया छ्याञ्ले विमल श्रेष्ठं कनादिल ।

करिब ४६ गू लख १७,४९६ तका बराबरपाखें निर्माण जुइगु संग्रहालयय् थौंकन्हय् चलनचल्तीइ दुगु नेवाः कला, संस्कृति, परम्परा न्हंके मबीगु व न्हू पुस्तां उकिया जानकारी काये फइगु समाजं न्ह्यथंगु दु । संग्रहालयय् नेवाः कला, संस्कृति जक मखसे मेमेगु समुदाय, जातजातिइ प्रचलन दुगु संस्कृतियात नं दुथ्याकेगु समाजं न्ह्यथंगु दु ।

संग्रहालयया न्हापांगु तँय् सभाहल, नितँ जालय् संग्रहालय व स्वतँ जालय् ज्याकू दइ । कला, संस्कृति संरक्षणया निंतिं संग्रहालय निर्माणं रामपुरया कला, संस्कृतिलिसें पर्यटन विकासय् महत्वपूर्ण तिबः जू वनीगु विश्वास लुम्बिनी प्रदेशसभा सदस्य लिसें प्रदेशका अर्थ, उद्योग तथा पर्यटन समितिका सभापति राजुप्रसाद श्रेष्ठं प्वंकादीगु दु ।

सम्बन्धित बुखँ

LEAVE YOUR COMMENTS