पुजाया सतकया ग्वाहालिं कुवेतयात बुकल
येँ (नेपालभाषा टाइम्स)- आइसिसी यु–१९ विश्वकप एसिया छनोट २०२४ या न्यागूगु कासाय् नेपालं कुवेतयात १६५ रनया तःधंगु रन अन्तरं बुकूगु दु । नेपाःया कप्तान पुजा महतों उत्कृष्ट प्रदर्शन यासें ब्याटिङपाखे शतक प्रहार याःगु खःसा उत्कृष्ट बलिङ यासे न्यागू विकेट नं काःगु खः ।
पुजा नेपाः मिसा क्रिकेट शतक प्रहार याःम्ह निम्हम्ह मिसा कासामि जूगु दुसा यू–१९ मिसा क्रिकेटय् शतक प्रहार याःम्ह न्हापांम्ह कासामि नं जूगु दु । अथेहे छगू हे कासाय् शतक प्रहार यासें न्यागू विकेट काःम्ह पुजा नेपाःया न्हापांम्ह मिसा क्रिकेट कासामि नं जूगु दु । पुजां ६९ बलय् १७ चौका थ्वासें नटआउट १३० दयेकूगु खः । अथेहे प्यंगू ओभर बलिङ यासें मुक्कं च्यागू रन जक बिया छगू मेडन ओभरसहित न्यागू विकेट काःगु खः ।
युएइ जुयाच्वंगु आइसिसी यू–१९ मिसा टी–२० एसिया छनोटय् न्हापां ब्याटिङ याःगु नेपालं निर्धारित २० ओभरय् निगू विकेटया क्षति २१३ रन दयेकूगु खः । नेपाःया मिसा क्रिकेट टिमं दयेकूगु थ्व आःतकया दकलय् तःधंगु योगफल खः । अजमानया द सेभेन रंगशालाय् जूगु कासाय् नेपाःया निंतिंसोनी पाख्रीनं नटआउट ४३, सावित्री धामीं ११ व सान प्रवीनं ६ रन दयेकूगु खः ।
नेपालं आः धेधेंबल्लाया अन्तिम कासा बुधवाः घरेलु टिम युएइलिसे म्हिती । बुधवाः जुइगु कासाय् युएइयात तःधंगु रन अन्तरं बुकल धाःसा नेपाः विश्वकपया निंतिं छनोट जुइ ।
नेपालं बिउगु तःधंगु लक्ष्य ज्वना मैदानय् वःगु कुवेत १३ ओभरय् मुक्कं ४८ रन दयेका अलआउट जूगु खः ।
LEAVE YOUR COMMENTS