पत्रकार दबू ख्वप कचाय् न्हूगु ज्यासना पुचः

ख्वप – नेवाः पत्रकार राष्ट्रिय दबू ख्वप कचाया खुक्वःगु दँमुँज्या व स्वक्वःगु तःमुँज्यां कचाया न्हूगु ज्यासना पुचः ल्यःगु दु । वंगु शनिवाः जूगु तःमुँज्यां रामगोपाल तमखुया नेतृत्वय् गुम्हेसिया न्हूगु ज्यासना पुचः ल्यःगु खः । तमखुया अध्यक्षताय् न्हूगु ज्यासना पुचःलय् सुरेश श्रेष्ठ उपाध्यक्ष, देवेन्द्र प्रजापति सचिव, चन्द्रकृष्ण श्रेष्ठ कोषाध्यक्ष व दुजलय रिता दुवाल, प्रकाश मल्ल, राजत गारु, ऋषिकेश श्रेष्ठ व सिमान्त शिल्पकार सर्वसम्मत रुपं निर्वाचित जुयादीगु खः ।

अथे हे उगु तःमुँज्यां बाबुकाजी श्रेष्ठ, रत्नकृष्ण श्रेष्ठ, राजाराम नापित, कृष्ण किसि व पूर्णभक्त दुवालयात केन्द्रीय पार्षद ल्यःगु दु । थ्व स्वयां न्ह्यः जूगु ज्याझ्वलय केन्द्रीय नायः श्रीकृष्ण महर्जनं सरकारं हःगु मिडिया काउन्सिल विधेयक सरोकारवाला पक्षलिसे सहलह मयासे समन्वयया लिधंसाय् हयेत स्वःगुलिं उकियात कयाः विरोध यायेमाःगु खः धयादिल ।

लिसें वय्कलं संविधानय् हे संचार सम्बन्धतय् गलत रुपं ब्याख्या यानातःगु धासें उगु ऐन हे खारेज यायेत नं माग यानादिल । ज्याझ्वः दबूया ख्वप कचाया नायः ईश्वरकाजी खाइजुया सभापतित्वय् जूगु खः ।पत्रकार दबूया स्वक्वःगु तःमुँज्याया झ्वलय् देयन्यंकंया कचाया अधिवेशन यायेगु निर्णयकथं ख्वप कचाया तःमुँज्या जूगु खः । दबूया केन्द्रीय अधिवेशन थ्व हे वइगु कात्तिकया लिपांगु वालय् येँय जू वनाच्वंगु दु ।