गुथि संस्थानयात टेन्डर हे खारेज यायेत निर्देशन
येँ – गुथि संस्थानं टेन्डर आह्वान यानाः धरहराया दक्षिणपाखे दयेकेगु तयारी यानाच्वंगु कम्प्लेक्स आः दयेके मबीगु सहमति जूगु खँ सीदुगु दु । राष्ट्रिय पुनर्निर्माण प्राधिकरणया प्रमुख कार्यकारी अधिकृत व मनपा दथुइ उगु सहमति जूगु खँ २२ वडाया वडाध्यक्ष चिनिकाजी महर्जनं ‘नेपालभाषा टाइम्स’यात कनादिल ।
वंगु २६ गते प्राधिकरण प्रमुख कार्यकारी अधिकृत युवराज भुसाल, गुथि संस्थानया निमित्त प्रमुख दीपकबहादुर पाण्डे, येँ महानगरपालिका मेयर विद्यासुन्दर शाक्य, मनपाया प्रमुख कार्यकारी अधिकृत यादव कोइराला, प्राधिकरणया पदाधिकारी, प्रमुख जिल्ला अधिकारी केदारनाथ शर्मा व २२ वडाया वडाध्यक्ष चिनिकाजी महर्जनपिं दुथ्याःगु बैठकं उगु निर्णय याःगु खः ।
उगु बैठकया निंतिं सांसद कृष्णगोपाल श्रेष्ठं विशेष भूमिका म्हितादीगु खः ।धरहरा पुनर्निर्माणया तयारी जुयाच्वंगु इलय् उकियात लिच्वः लाइकथं गुगुं नं कथंया संरचना मदयेकेत नं गुथि संस्थानयात निर्देशन बीगुया लिसें ठेक्का सम्झौता भंग यायेत नं निर्देशन बिउगु दु ।
ठेक्का सम्झौता भंग याइबलय् मालीगु ध्यबाया व्यवस्था धाःसा पुनर्निर्माण प्राधिकरण मार्फत सरकारं यायेगु निर्णय नं जूगु दु । गुथियात अन छेँ दनेगु रोके याये मते धकाः अदालतं हे आदेश बीधुंकूगु खःसां आः सहमतिं छेँ दनेगु रोके याःगु खः ।
बैठकय् संस्थानया जग्गा थःपिंसं हकभोग याये दयेमाः धकाः गुथिया निमित्त प्रमुख पाण्डें धयादीगु खःसां बैठकं उकियात अस्वीकार याःगु खः ।
अथेहे बैठकं मनपां पारित यायेधुंकूगु नक्सा खारेज यायेगु, येँ मनपां धरहरा परिसरय् भाडाय् तयातःगु फुक्कं रेष्टुराँ व शटर तकं झिंन्यान्हुया दुने बन्द यायेत निर्देशन बिउगु दु ।
अथेहे सञ्चार मन्त्रालय अन्तर्गत अन लानाच्वंगु गोश्वारा हुलाक कार्यालय तकं अनं मेथाय् चीकेगु निंतिं सञ्चार मन्त्रालययात पुनर्निमाण प्राधिकरणं इनाप यायेगु व नेपाल राष्ट्र बैंकया टक्सार विभागयात उचित व्यवस्थापनया निंतिं प्राधिकरणं नेपाल राष्ट्र बैंकलिसे सहलह यायेगु निर्णय नं जूगु दु ।
वडाध्यक्ष महर्जनं उगु थासय् न्हापा सतः दुगु खःसा आः नं सतः हे दयेकेगु पाय्छि जुइ तर गुथिं सपिङ कम्प्लेक्स दयेकेगु तयारी याःगुलिं थ्व ज्या उचित मजूगु खँ कनादीगु दु । सरकारं सडक चिबाला जुल धकाः जनताया छेँ थुनेगु ज्या यानाच्वंगु इलय् सरकारया हे छगू निकायं धाःसा खालि थासय् कम्प्लेक्स दयेकेगु नं पाय्छि मजूगु खँ वय्कलं कनादिल ।
LEAVE YOUR COMMENTS