राज्यया विभेदकारी नीतिया विरोध

येँ – प्रतिनिधिसभा सदस्य राजेन्द्र श्रेष्ठं राजनीतिक क्रान्ति नीप्यघौया दुने नं जुइ फइगु तर सामाजिक व आर्थिक परिवर्तनया निंतिं आपालं ई काइगु धासें प्रतिपक्षी दलया नेतातय्सं वर्तमान सरकार गठन लिपा आतक छुं नं ज्या मजूगु धइगु खँयात कयाः कटाक्ष यानादीगु दु ।

संघीय समाजवादी फोरम (ससफो) नेपालया सहअध्यक्षतकं जुयादीम्ह सांसद श्रेष्ठं संघीय सहंसदया चिकुलाया अवधिवेशय् नवासें वर्तमान सरकारं विकासया निंतिं पूर्वाधार निर्माण सम्बन्धय् नीतिगत रुपं बांलाःगु ज्याया शुरुवात जूगु व लोकतान्त्रिक मूल्य व मान्यतालिसें मौलिक हक लगायतया कार्यान्वयन सन्दर्भय् इलय् हे कानुन निर्माण यानाः सकारात्मक सन्देश बिउगु दु धयादिल ।

सांसद श्रेष्ठं नेपाःया संविधानं संघवादया आधारभूत सिद्धान्त अंगीकार मयाःगु धासें धाःसा विरोध यानादिसें संघीयता कायान्वयन सन्दर्भय् २ नं. प्रदेशं संविधानकथं प्रदेश प्रहरी कानुन निर्माण याःगु खँय् केन्द्र सरकारं विरोध याःगु गलत खः धयादिल । ‘संसारय् कानुनया मातहतय् कानुन दइगु व्यवस्था नेपालय् बाहेकं मेगु गनं नं मदु’, वय्कलं धयादिल, ‘संघीय कानुन व प्रादेशिक कानुन निगुलिं संविधान मातहतय् दइगु खः, संघीय कानुन मातहतय् प्रादेशिक कानुन दइगु मखु ।’

कर्मचारी समायोजन विधेयकया विरोध यानादिसें वय्कलं संसदयात छले यानाः कर्मचारी समायोजन अध्यादेश हयेगु ज्या पाय्छि मखु धयादिल । राज्यया विभेदकारी नीतिया विरोध यासें वय्कलं देशय् संघीय गणतन्त्र वयेधुंकाः नं भुखाचं क्षति जूगु सम्पदा पुनःनिर्माणय् पक्षपात याःगु द्वपं बियादिल । वय्कलं मरुसतः पुनःनिर्माणय् ध्यान मबिउगु व रानीपुखू शिलान्यास याये धुंकाः नं पुरातात्विक धंगं पुनःनिर्माण यायेगु ज्या न्ह्याः मवंगु खँय् आक्रोश प्वंकादिसें धरहरायात नं भ्यू टावर दयेकेत स्वयाच्वंगु द्वपं बियादिल ।