राष्ट्रपतिया भूमिका विवादास्पद

येँ – आः देय्या राजनीतिइ राष्ट्रपतिं आवश्यक भूमिका म्हिते मफयाच्वंगु खँ राजनीतिक विश्लेषक राजेन्द्र महर्जनं धयादीगु दु । ‘नेपालभाषा टाइम्स’ लिसे खँ ल्हायेगु झ्वलय् वय्कलं राष्ट्रपति विद्यादेवी भण्डारीं गुकथं भूमिका म्हिताच्वंगु दु व पाय्छि मजू धासें राष्ट्रपति भण्डारी आः नं पार्टीया उपाध्यक्षं म्हितीगु भूमिका जक म्हिताच्वंगु टिप्पणी यानादिल ।

वय्कलं धयादिल, ‘राष्ट्रपति जुइधुंकाः पार्टीया छुं नं पदय् दुगु खःसा उकिं राजीनामा बीमाः । देय्या हितया निंतिं राष्ट्रपतिं थुकथं राजीनामा बीगु खः । तर थन ला राष्ट्रपतिं पार्टीया चीधंगु समस्याय् तकं पार्टीया नेता कार्यकर्तायात सःताः निर्देशन बीगु ज्या जुयाच्वंगु दु, थ्व विल्कुल
गलत खः ।’

राष्ट्रपति थ्व स्वयां न्ह्यः वैशाखया न्हापांगु वालय् प्रधानमन्त्री केपी शर्मा ओली दल विभाजन सम्बन्धी हःगु विधेयकयात गुलि अःपुक स्वीकृत याःगु खः आः नं छुं जुयाः प्रधानमन्त्री अज्याःगु विधेयक हल धाःसा उकियात अःपुक स्वीकार याइगु अवस्था दुगु धासें विश्लेषक महर्जनं थ्व देय्या निंतिं उचित मजूगु खँ धयादीगु दु । राष्ट्रपतिया आःया भूमिकां विवादय् मलाइ ला धकाः न्यनागु न्ह्यसलय् विश्लेषक महर्जनं धयादी, ‘राष्ट्रपति न्हापा नं विवादय् लायेधुंकूगु दु । आः नं प्रधानमन्त्रीं छु धाल वहे याइगु अवस्था दु ।’

वय्कःया कथं देशय् ब्वलनीगु गुगुं नं कथंया राजनीतिक घटनाक्रमयात कयाः राष्ट्रपति फुक्कं राजनीतिक पार्टीयात सःताः सुझाव कायेमाःगु खःसां नं आः तक राष्ट्रपति भण्डारीं अज्याःगु सहमति कायेगु ज्या मयाःगु खँ कनादिल । वय्कलं धयादिल, ‘आः तक राष्ट्रपतिया गतिविधि स्वयेगु खःसा प्रमं छु छु धाल व हे जक ज्या यानाच्वंगु खनेदु ।’

प्रधानमन्त्री केपी ओलीं पार्टीया दबाब कथं अःपुक राजीनामा बीगु सम्भावना मदुगु नं वय्कःया विश्लेषण दु । ‘बरु पार्टी कुचा थलाः जूसां थःगु सत्ता ल्यंकेत कुतः याइ’ वय्कःया बिचाः दु ।

वय्कलं प्रधानमन्त्री ओली प्रवृत्ति तानाशाही जुयाः वनाच्वंगु धासें उकिं मुक्त जुइमाःगु थौंया आवश्यकता जूगु खँ नं धयादीगु दु । प्रम ओली थःगु सत्ता ल्यंकेगु निंतिं आपालं हथकण्डा नालीगु सम्भावना दुगु खँ कनादिसें उकिया निंतिं पार्टी हे विभाजन यायेमाःसां नं प्रम ओली लिचिली मखुगु वय्कःया धापू दु ।

सम्बन्धित बुखँ

LEAVE YOUR COMMENTS