तोखाय् स्थानीय पाठ्यसफू ‘झीगु तोखा देय्’
येँ(नेपालभाषा टाइम्स)- येँया उत्तरी लागाय् लाःगु सांस्कृतिक व ऐतिहासिक नगरी तोखाय् स्थानीय पाठ्यसफू ‘झीगु तोखा देय्’ तयार जूगु दु । तोखा नगरपालिकां स्थानीय पाठ्यक्रमय् आधारित जुयाः स्थानीय नेवाः भासं ‘झीगु तोखा देय्’ पाठ्यसफू तयार याःगु खः ।
बाल विकास कक्षानिसें ३ गू तगिं तकया निंतिं तयार याःगु उगु पाठ्यसफू वंगु वालय् तोखा नगरपालिका शिक्षा, युवा तथा खेलकुद शाखापाखें ग्वसाः ग्वःगु छगू ज्याझ्वलय् तोखा नगरपालिकाया प्रमुख प्रकाश अधिकारी, उपप्रमुख मुरारी तामाङलिसें थीथी व्यक्तिपिंसं मंकाःकथं सार्वजनिक यानादीगु खः ।
ज्याझ्वलय् न्ववासें नगर प्रमुख अधिकारीं थ्व मुक्कं तोखा नगरपालिका जक मखु, तोखा नगरवासीया निंतिं ऐतिहासिक सफललता खः धयादिल । थःपिंसं महानगरया स्वयां नं उत्कृष्ट सफू तयार यानागु दावी यानादिसें वय्कलं थौंकन्हय् नगरपालिकाया वडा २ व ३ (साविकया तोखा चण्डेश्वरी व सरस्वती गाविस)या सामुदायिक व संस्थागत ब्वनेकुथिइ स्वंगू तगिं तक स्थानीय पाठ्यक्रम अन्तर्गत नेपालभाषा ब्वंकेगु ज्या जुयाच्वंगु जानकारी बियादिल । थ्व छगू शुरुवात खः धासें थुकियात अझ परिमार्जित व संशोधन यानाः च्यागू तगिं तक हे नेपालभाषा अध्यापन याकेगु व नगरपालिका न्यंकं लागू यायेत छगू बृहत भेला यायेगु योजना दुगु नं जानकारी बियादिल ।
‘थम्हं गबलें नं नेवाः समुदाययात उपेक्षित यानागु मदु धासें नगर दुनेया दक्वं भाय्, धर्म, संस्कृति व जातजातियात न्ह्याबलें नं सम्मान याना वयाच्वनागु व सम्मान याना हे च्वनेगु जुइ’ प्रमुख अधिकारीं धयादिल, ‘भाषा, जाति, कला संस्कृति उत्थानया निंतिं नगरपालिकापाखें न्ह्याबलें आवश्यक ग्वाहालि याना हे च्वनेगु जुइ ।
उपप्रमुख तामाङं सांस्कृतिक सम्पदाया तःमि गुकिया नामं तोखा देय्या नां च्वन, उगु समुदायया मान, शान व आत्मसम्मानया निंतिं उमिगु भाय्यात नगरपालिकां न्ह्याबलें नं सम्मान हे यानाच्वनेगु जुइ धयादिल । तोखा नगरपालिकाया नुगः धयागु हे स्थानीय नेपालभाषा खः धासें स्थानीय मातृभाषा पठनपाठनयात नगरया झिंछगुलिं वडाया ब्वनेकुथिइ अनिवार्य लागू यानायंकेगु व उकिया निंतिं थम्हं माक्व ग्वाहालि यायेकथंया भूमिका म्हितेगु जुइ धयादिल ।
अथेहे २ वडाया अध्यक्ष धर्मेन्द्र श्रेष्ठं ब्वँमिपिनिगु सर्वाङ्गिन विकासया निंतिं पाठ्यसफू दयेका वनेमाःगु खँय् बः बियादिसें शिक्षा नीति असफल जुल धाःसा समाज व गां जक मखु, मुक्कं देय् हे असफल जुइ धयादिल । सफल शिक्षा नीति दयेकाः समाजयात भिंगु लँपुइ यंके फत धाःसा उकिं देय् सफल जुइ धयादिल । लिसें वय्कलं विद्यार्थीयात ब्वंकेत जक पाठ्यक्रम निर्माण याये मजिउगु खँय् नं बः बियादिल ।
LEAVE YOUR COMMENTS