नेकांया भोट ‘गं’लय् वंगु आशंका

येँ (नेपालभाषा टाइम्स)- मंसिर ४ या आम निर्वाचनय् नेपाली कांग्रेसं माओवादी व एकीकृत समाजवादीयात धोका बियाः रवि लामिछानेया राष्ट्रिय स्वतन्त्र पार्टीलिसे साँठगाँठ याःगु आशंका याना हःगु दु । थौंकन्हय् पिहां वयाच्वंगु चुनावी लिच्वःया आधारय् राजनीतिक ख्यलय् अज्याःगु अनुमान यानाहःगु खः ।

चुनावय् एमाले विरुद्ध ल्वायेत नेपाली कांग्रेसं माओवादी केन्द्र, एकीकृत समाजवादीलिसे चुनावी तालमेल याःगु खः । तर कम्युनिष्टतलिसे याःगु थ्व तालमेल कांग्रेसया आपालं नेता कार्यकर्तातय्त धाःसा मयःगु जुयाच्वन । उकिं थ्व पार्टीतलिसे गठबन्धन दयेकाः तालमेल याःगु खःसां भोट धाःसा रवि लामिछानेया राष्ट्रिय स्वतन्त्र पार्टीयात बिउगु खँ धाःगु दु ।

आः पिहां वयाच्वंगु लिच्वतय् कांग्रेसं गन गन तालमेल यानाः माओवादी केन्द्र व एकीकृत समाज–वादीयात थाय् त्वःतूगु खः अन अन रास्वपाया उम्मेदवार त्याःगु खनेदु । कांग्रेसं येँया क्षेत्र नं. २, ७, ८ य् माओवादी व ‘एस’ यात थाय् त्वःतूगु खःसा थ्व स्वंगुलिं थासय् रास्वपाया उम्मेदवार त्याःगु दु । येँ–६ नम्बरय् जक कांग्रेसया भिमसेनदास प्रधानयात समेत बुकाः रास्वपा त्याःगु दु । थुकिं छु सीदु धायेबलय् कांग्रेसं येँया थीथी थासय् माओवादी व एसयात सिट त्वःतूसां भोट धाःसा मेथाय् बियाः ‘धोका’ बिउगु खनेदु ।

विशिष्ट सूत्रं धाः कथं मतदान जुइ स्वयां निन्हु न्ह्यः कांग्रेस कार्यकर्तातय् त थःपिनि भोट माओवादी वा एसयात मखु रास्वपाया ‘गं’ चिन्हय् तयेगु धकाः सर्कुलर हे वःगु खः । कम्युनिष्टतय्त भोट बी मयःपिं कार्यकर्तातय्सं थुकियात सकारात्मक रुपं काःगु खः ।

अथे हे प्रदेशसभाय् रास्वपां उम्मेदवार थंगु मदु । रास्वपां संघीय व्यवस्था प्रति थःपिनि विश्वास मदु धकाः अन उम्मेदवारी मबिउगु खः । उकिं कांग्रेसं प्रदेशपाखे धाःसा थःपिनि भोट राप्रपाय् यंकाः तया बिउगु नं आशंका याना हःगु दु ।

सम्बन्धित बुखँ

LEAVE YOUR COMMENTS