कोलोराडोय् येँयाःया ज्याझ्वः जुइगु

येँ(नेपालभाषा टाइम्स)÷ अमेरिकाया कोलोराडो सहरय् नं थुगुसी येँयाः नखः हनीगु जूगु दु । कोलारोडो नेवाः खलःया ग्वसालय् न्हापांखुसी कोलोराडोय् येँयाः नखः हनेत्यंगु खः ।
कोलोराडो सहर नेवाःतय् ख्वातुगु बसोबास दयाच्वंगु थाय् खः । नेवाः धर्म, संस्कृति संरक्षणलिसें नेवाः पहिचान ल्यंका तयेगु ल्याखं खलकं न्हापांखुसी येँयाः नखः हनेत्यंगु खः । थ्व हे वइगु सेप्टेम्बर २२ आइतवाःकुन्हु येँयाः नखःया ज्याझ्वः जुइगु खलकं जानकारी बिउगु दु ।
थ्व कुन्हु वर्षा व सहकालया द्यः इन्द्रया विशेष पुजा यानाः सहरय् च्वंपिं सकल नेवाःतय् उपस्थितिइ येँयाः नखः हनेगुकथं तयारी जुयाच्वंगु खलकं जानकारी बिउगु दु । कोलोराडोस्थित नेपाली सांस्कृतिक केन्द्र, नेपाली घरय् उगु ज्याझ्वः यायेत्यंगु खः ।
खलःया कार्यवाहक नायः मनोजकाजी तुलाधरं धर्म, संस्कृति, परम्परा संंरक्षण व नेवाःया पहिचानयात म्हसीकेगु निंतिं खलःपाखें येँयाः नखः हनेगु शुरु यायेत्यनागु खँ धयादीगु दु । सेप्टेम्बर २२ कुन्हु न्हिनसिया १२ ताः इलंनिसें सनिलया ५ ताः ईतक ज्याझ्वः जुइगु नं वय्कलं जानकारी बियादीगु दु ।
ज्याझ्वलय् तलेजु भवानीया प्रतिमूर्ति, जीवित देवी कुमारिया खः, लाखेप्याखं, धिमेप्याखं, पुलुकिसिप्याखं हाथु हायेकेगु, परम्परागत नेवाः धुन, म्येँ, हुलाप्याखं न्ह्यब्वयेगु व ज्याझ्वलय् ब्वति कयादीपिं सकसितं समय्बजि नकेगु ज्याझ्वः तयातःगु दु ।
कार्यवाहक नायः तुलाधरं कोलोराडोया इतिहासय् न्हापांखुसी कुमारिया खः सालाः येँयाः नखः हनेत्यगु लसता इनादिसें ज्याझ्वलय् ब्वति काइपिंत निःशुल्क प्रवेश व समय्बजिया व्यवस्था जुइगु जानकारी नं बियादीगु दु ।