लन्दनय् पासा पुचः गुथिया न्हूदँ हना

येँ – पासा पुचः गुथि युकें म्हपुजा व नेपाल संवत् ११३९ न्हूदँ तःजिक हंगु दु । लन्दनया ओकिङ्गटन म्यानर स्कुलय् जूगु ज्याझ्वलय् तपाःगु मन्दः दयेकाः साँस्कृतिक ज्याझ्वः यासें नेवाः भ्वय् नयाः न्हूदँ हंगु खः । ज्याझ्वलय् सहभागी पाहाँपिंत पञ्चकन्यापाखें सिन्हः तिकाः लसकुस याःगु खः ।

ज्याझ्वलय् गुथिया मू दुजः सुज मानन्धरं व न्ह्युमिला तुलाधरं म्हपुजाया महत्व बारे न्ववानादीगु खःसा उपाध्यक्ष रुक्मिनी मानन्धरं लसकुस यानादीगु खः ।स्वसः व स्वीम्ह पाहाँपिनि उपस्थिति दुगु ज्याझ्वःया उलेज्या पासा पुचः गुथि युकेया संस्थापक दुजः मदुम्ह ईश्वर मानन्धर जहान जानकी मानन्धरं यानादीगु खः ।

मूपाहाँ मय्जु मानन्धरं एनिमेटेड फिल्म द लिजेन्ड अफ शंखधर पाखें दयेकूगु कमिक (किपाहना बाखं) व गुथिया मू दुजः ज्ञानीशोभा तुलाधरं च्यादीगु चिनाखं सफूया विमोचन नं यानादीगु खः । मय्जु तुलाधरं थःगु छपु चिनाखं ब्वनाः नं न्यंकादीगु खः । ज्याझ्वलय् केन्द्रीय संयोजन कमिटीया नायः कुमार श्रेष्ठं सकसितं न्हूदँया भिंतुना देछायादीगु खः ।

तपाःगु मन्दः न्ह्यःने जूगु ज्याझ्वलय् मचापिं कलाकार शैलेस डंगोल, प्रिसा श्रेष्ठ, जिया जोशीया लिसें भाविका लोप्चान व रश्मिता दर्लामीं नेवाः व नेपाली म्येँय् हुलाप्याखं न्ह्यब्वःगु खः । अथेहे झिदँ हे मथ्यंनिपिं मस्तय् ब्याण्ड ‘कुतः’या दुजःपिं आरुस सिंह, ओनिक सिंह व सरिन श्रेष्ठं राष्ट्रिय म्येँ व नेवाः राष्ट्रिय म्येँ नं न्ह्यब्वःगु खः ।

ज्याझ्वलय् पासा पुचः गुथि युके लन्दनया अध्यक्ष संयुक्त श्रेष्ठं वइगु निदँ दुने थःपिंसं यायेगु ज्याया बारे जानकारी बियादिसें न्ह्याबलें थें थःपिंत ग्वाहालि दइगु आशा प्वंकादिल । अथेहे मूछ्याञ्जे सन्दीप श्रेष्ठ व कासा सचिव सुमित वज्राचार्यं थःपिनिगु गुथि ब्याण्डपाखें नेवाः व खस नेपाली म्येँ न्ह्यब्वयादीगु खः ।

युनाइटेड नेवाः युएसएस टेक्सास पाखें पाहाँ कथं झायादीम्ह युसुफमान श्रेष्ठं खिं बाजं व धिमे बाजंया लिसें लाखें प्याखं न्ह्यब्वयादिल । अथेहे वरिष्ठ कलाकार मदन थापां सारंगीया धुनय् नेवाः म्यँे न्यंकादीगु खः । अथेहे पासा पुचः गुथि साउथइस्ट च्याप्टरया पुलांम्ह अध्यक्ष मनिसकुमार श्रेष्ठं थःगु प्रतिभा नक्षत्र पुचःया कलाकारतलिसे जानाः प्याखं न्ह्यब्वयादिल ।

सांस्कृतिक ज्याझ्वलय् ब्वति काःपिंत गुथिया संस्थापकपिं महन्त श्रेष्ठ, अर्जुन प्रधान, अमृतरत्न स्थापितपिंसं सुभाय्पौ लःल्हानादीगु खः ।
न्हूदँया लसताय् तःखाला थेंज्याःगु नेवाः नसाज्वलं तयाः भ्वय् नं न्यायेकूगु खःसा ज्याझ्वःया अन्तय् सहभागी सकसिनं नायः श्रेष्ठं मसलाप्वः इनाबिउगु खः ।