ने. सं. ११४४ कौलाथ्व सप्तमी - फूलपाती

‘खुयायंकूगु कलाकृति लित हयेत दबाब मगात’

येँ (नेपालभाषा टाइम्स)- नेपालं खुयायंकाः विदेशय् थ्यनाच्वंगु गुलिखे पुरातात्विक कलाकृति नेपाः लित हयेत अझ नं थाकुयाच्वंगु दु । थज्याःगु कलाकृति लित हयेगु निंतिं नेपाःपाखें हे जुइमाःगु अभियान व दबाबया म्होतिं यानाः नं लित हयेमफयाच्वंगु खँ अभियानकर्मीतय्सं धयाच्वंगु दु । थथे हे लित हयेमफयाच्वंगु छगू कलाकृति खः – तलेजु भवानीया कण्ठहार । थ्व कण्ठहार अमेरिका शिकागोय् च्वंगु ‘आर्ट इन्स्टिच्यूट अफ शिकागो’य् विशेष महत्व बियाः प्रदर्शन यानातःगु दु । थ्व कण्ठहार लित कायेगु निंतिं कुतः जुयाच्वंसां शिकागों लित बीगु इच्छा धाःसा यानाच्वंगु मदु ।

अमेरिका लगायत विदेशी संग्रहालयय् दुगु थज्याःगु नेपाःया कलाकृति फयांफतले लित मबीत स्वइगु छगू कारणं नेपालं माक्वः दबाब बीमफुगुलिं नं खः । छम्ह अभियानकर्मी कणकमणि दीक्षितं धाःगु दु, ‘नेपाःया थीथी त्वालं थीथी समुदायया कलाकृति खुयायंकाः विदेशय् थ्यनाच्वंगु दु, तर थनया समुदाय हे अज्याःगु कलाकृति लित हयेगु खँय् जागरुक जूगु खनेमदु । मखुसा ला त्वाःत्वालं हे थःपिनिगु आस्थालिसे स्वानाच्वंगु कलाकृति लित हयेत दना वयेमाःगु खः ।’

पुरातत्व विभागया महानिर्देशक सौभाग्य प्रधानाङ्गं बिबिसीलिसे खँ ल्हासें आर्ट इन्स्टिच्यूट अफ शिकागो थ्व कण्ठहार लित बीत अनिच्छुक खनेदुगु खँ धयादीगु दु । थ्व कण्ठहार लित बीगु निंतिं विभागं तःक्वः पौ छ्वयेधुंकूगु दु तर शिकागों धाःसा नेपाःया हे खः धयागु थप प्रमाण माल धकाः जक धयाच्वंगु दु । जबकि शिकागों थ्व कण्ठहार ब्वयातःथाय् तयातःगु विवरणय् हे नेपाःया जुजुु प्रताप मल्लं दरवारया इष्टदेवीयात छाःगु धकाः न्ह्यथनातःगु दु । अथेहे थुगु कण्ठहारय् हे ‘श्रीश्रीश्री भगवति देवी जननी जयति । स्वस्ति महाराजाधिराज श्री श्री राज राजेन्द्र कवीन्द्र जय प्रताप मल्ल देव स कुथि जुरो शुभ’ धकाः च्वयातःगु दु ।

थ्व कण्ठहार नेपाःया खः धयागु प्रमाण उगु कलाकृति हे न्ह्यथनातःगु दुसां शिकागों छक्वःपतिं थप प्रमाण माल धकाः धयाच्वंगु धयागु उपिं थ्व कलाकृति लितबीत इच्छुक खनेमदुगु खः । विभागया महानिर्देशक प्रधानाङ्गं धयादीगु दु, ‘‘थ्व कण्ठहार अनया उत्कृष्ट कलाकृति मध्ये छगू जूगुलिं लित बीत अनिच्छुक थें खनेदु ।’