अन्ततः नेतातय्गु हे ह्वीप वइगु
३ नम्बर प्रदेशय् नां व राजधानीया विवाद
येँ – नेपाल कम्युनिष्ट पार्टीया निम्ह अध्यक्षतय् सहमति कथं ३ नम्बर प्रदेशया स्थायी राजधानी आः हेटौंडा हे जुइगु सम्भावना अप्वया वंगु खँ सूत्रं धाःगु दु । प्रधानमन्त्री लिसें नेकपाया अध्यक्ष केपी शर्मा ओली हेटौंडाया पक्षय् मदुगु खःसां मेम्ह अध्यक्ष पुष्पकमल दाहाल हेटौंडायात हे प्रदेशया राजधानी दयेकेगु पक्षय् वंगु जुयाः प्रम ओली नं उकी हे सहमत जूवंगु खँ धाःगु दु ।
हेटौंडाय् स्थायी राजधानी तयेगु बारे पार्टीपाखें ह्वीप हे वये फइगु सम्भावना समेत अप्वः दुगु खँ धाःगु दु । यदि अज्याःगु ह्वीप वल धाःसा हेटौंडाया पक्षय् मदुपिं सांसदतय्सं छु यायेगु धकाः नं दुनें दुनें सहलह जुयाच्वंगु खँ सूत्रं धाःगु दु । प्रदेशया अप्वः सांसदत हेटौंडाया पक्षय् मदुगु खँ नं सूत्रं धाःगु दु ।
हेटौंडाय् राजधानी तयेगु खँयात दुई तिहाइ स्वयां अप्वः सांसदतय्सं असहमति प्वंकाच्वंगु सूत्रया दावी दु । अथे हे प्रदेशया नां छु तयेगु धइगु बारे नं आः तक छुं सहमति मजूनिगु खँ नं धाःगु दु । उकिं प्रदेशया नामाकरणया सवालय् नं केन्द्रीय नेतापाखें निर्देशन वये फइगु खँ धाःगु दु ।
सत्तारुढ पार्टी नेकपाया पार्टी लाइन प्रदेशया नां ‘बागमती’ तयेमाः धइगु पक्षय् दुगुलिं थ्वहे नां कायम जू वनेफुगु खँ नं सूत्रं धाःगु दु ।
अथे खःसां आदिवासी जनजाति लगायत पूर्व माओवादी सांसदतय्सं धाःसा ‘नेपालमण्डल’ वा ‘नेवाः–ताम्सालिङ’ प्रदेश तयेमाः धकाः बः बियाच्वंगु दु । प्रदेशया नां ‘नेपालमण्डल’, ‘नेवाः–ताम्सालिङ’ वा ‘गौरीशंकर’ तयेमाः धकाः खँ वयाच्वंगु खःसा आः उकी पार्टीया लाइन धकाः ‘बागमति’ नं थपे जू वःगु दु ।
आदिवासी जनजाति लिसें पूर्व माओवादी सांसदतय्स थ्व फुक्क हे नांयात अस्वीकार यानाच्वंगु खँ सीदुगु दु । स्थायी राजधानीया सवालय् धाःसा प्रदेशया अधिकांश सांसदत ‘काभ्रे’या पक्षय् दुगु खँ धाःगु दु । उमिसं हेटौंडाय् राजधानी तयेबलय् निगू जिल्लायात जक सुविधा जुल धकाः तर्क तयेगु यानाच्वंगु दु ।
राजधानी बारे छलफल शुरु
प्रदेश नम्बर ३ य् म्हिगःनिसें प्रदेशया स्थायी राजधानीयात कयाः सहलह न्ह्याःगु दु । प्रदेश सभां वंगु असोजय् हे राजधानीया सम्भाव्यता अध्ययन यानाः प्रतिवेदन बुझे याःगु खःसां उकी सहलह धाःसा मजुयाच्वंगु खःसा म्हिगःनिसें सहलह न्ह्याःगु खः । प्रदेशया स्थायी राजधानीयात कयाः कांग्रेसं संसद अवरुद्ध यायेवं उकियात कयाः सहलह शुरु याःगु खः ।
म्हिगः जूगु सहलहय् न्ववायेगु झ्वलय् सांसद रमेश पौडेलं सरकार अझ नं अस्थायी राजधानीया हे मानसिकता दुगु धासें याकनं राजधानीया बारे क्वःछीत बः बियादिल । सहलह ज्याझ्वलय् न्ववाःपिं सांसदपिं रत्नप्रसाद ढकाल, प्रेमबहादुर पुलामी, गीता वाग्ले, प्रभात तामाङ, ओमबहादुर घलान, विराजभक्त श्रेष्ठं याकनं स्थायी राजधानी क्वःछीमाःगु खँय् बः बियादीगु खः ।
LEAVE YOUR COMMENTS