कान्तिपुर अध्यक्ष सिरोहियायात ज्वन

येँ (नेपालभाषा टाइम्स) कान्तिपुर मिडिया ग्रुपया अध्यक्ष कैलाश सिरोहियायात प्रहरीं ज्वंगु दु । सिरोहियायात ज्वनेत म्हिगः सनिलय् प्रहरीया छगू पुचः कान्तिपुरया थापाथली च्वंगु ज्याकुथिइ वंगु खः । सिरोहियायात ज्वनेत उपत्यका अपराध अनुसन्धान कार्यालयया प्रमुख एसएसपी सानुराम भट्टराई नेतृत्वय् छगू पुचः वंगु खः । सिरोहियायात वयागु ज्याकुथिं ज्वनाः पिने हःबलय् छझाः सरकारविरुद्ध नाराबाजी नं जूगु खः ।ज्वना यंकूगु इलय् पत्रकारतय्त प्रतिक्रिया बीगु झ्वलय् सिरोहियां गृहमन्त्री रवि लामिछानें प्रतिशोधया भावनां थःत ज्वंगु खँ धाःगु खः ।

थःत ज्वने न्ह्यः हे सिरोहियां आत्मसमर्पण यायेगु तयारी याःगु खः, तर आत्मसमर्पण याये न्ह्यः हे प्रहरी कान्तिपुरया ज्याकुथिइ हे वनाः वयात ज्वंगु खः । ज्वने न्ह्यः छगू विज्ञप्ति जारी यासें सिरोहियां थः छम्ह जिम्मेवार नागरिक जूगुलिं कानुन कथं जुइगु अनुसन्धानय् ग्वाहालि यायेत तयार दुगु खँ धाःगु खः । सिरोहियां म्हिगः जारी याःगु विज्ञप्तिइ धयातःगु दु, ‘सत्ता व शक्तिया दुरुपयोग यानाः कान्तिपुरविरुद्ध वंगु इलय् नं हस्तक्षेप जूगु दु, जि थः हे नं जेल वनागु दु । निरंकुश शाही शासनय् व अख्तियार प्रमुख लोकमान सिंह कार्कीया पालय् नं समाचार च्वःगु हे कारणं कान्तिपुरविरुद्ध थज्याःगु हे षडन्त्रण जूगु खः ।’

सिरोहियायात ज्वनेगु निंतिं म्हिगः हे जिल्ला अदालत धनुषां पक्राउ पूर्जी जारी याःगु खः । पक्राउ पुर्जी जारी जुइवं सिरोहिया थुकिया विरुद्ध सर्वोच्च अदालत वंगु खः । तर सर्वोच्चपाखें छुं फैसला वये न्ह्यः हे सिरोहियिायात ज्वंगु खः । सिरोहियां थःत ज्वनेगु आदेश बिउगु जिल्ला अदालत धनुषाया आदेश खारेज यायेमाःगु माग यानाः सर्वोच्च वंगु खः । सिरोहिया विरुद्ध वंगु वैशाख १६ गते जिल्ला प्रहरी कार्यालय धनुषाय् नागरिकता दुरुपयोग याःगु धासें जाहेरी लाःगु खः । जोहरीइ सिरोहियां निगू नागरिकता छ्यला किर्ते यानाच्वंगु द्वपं बियातःगु दु ।

जाहेरी बिउम्ह सर्लाहरीया इन्द्रजित महतों सिरोहियां हिमालयन रिइन्स्योरेन्स कम्पनीया संस्थापक शेयर न्याःबलय् छ्यःगु नागरिकता नम्बर व राहदानी, राष्ट्रिय परिचयपत्र कायेत छ्यलःगु नागरिकता नम्बर फरक फरक जूगु धाःगु दु । शेयर न्यायेत छ्यःगु नागरिकता नं. २८३९८८८६ खःसा मेमेथाय् छ्यलातःगु नागरिकताया नम्बर ३९६९८८८६ खः । सिरोहियां छ्यला वयाच्वंगु ३९६९८८८६ नम्बरया नागरिकता धाःसा धनुषाया हे शिवजी साहु तेलीया नामय् नं दु ।

सिरोहियां थःम्हं २०३४ सालय् हे ३९६९८८८६ नम्बरया नागरिकता कयागु जूगुलिं २०३६ सालय् मेम्हेसित नं उगु हे नम्बरया नागरिता बिउगु खँय् थःगु जिम्मेवारी जुइमखु धाःगु दु । अथेहे वं रिइन्स्योरेन्सय् धाःसा नागरिकता नम्बर तःगु गल्ती जूगु खँ धाःगु दु ।

सिरोहियां राजनीतिक प्रतिशोधया भावनां थःत ज्वेगु कुतः जुयाच्वंगु खँ धया वयाच्वंगु खः । म्हिगः थःत नापलायेत वःपिं कांग्रेसया नेतात लिसे खँल्हाबल्हा यायेगु झ्वलय् वय्कलं ब्ल्याकमेलिङ व राजनीति प्रतिशोध कायेत स्वःसां नं कान्तिपुरं थःगु ज्या यानाच्वनी धाःगु खः ।

गृहमन्त्री लामिछानेया नागरिकता काण्ड, सहकारी काण्ड लिसें थीथी काण्डयात कान्तिपुर पत्रिकां मदिक्क च्वयाच्वंगुलिं हे थःत प्रतिशोध कयाच्वंगु सिरोहिया धया वयाच्वंगु दु ।

थ्वहे झ्वलय् नेपाल पत्रकार महासंघया अध्यक्ष विपुल पोखरेलं सरकारया पलाः विरुद्ध सतकय् कुहां वयेगु खँ धाःगु दु । सिरोहियायात ज्वनेवं प्रतिक्रिया बिसें प्रहरीं बलजफ्ति संचार ख्यलय् आक्रमण याःगु द्वपं बिसें सतकय् कुहां वयेगु खँ धाःगु खः ।

अथेहे वरिष्ठ पत्रकार युवराज घिमिरें गृहमन्त्री लामिछानें नियोजित रुपं लोकतन्त्र अःखः संचार क्षेत्रय् आक्रमण याःगु खँ धाःगु दु ।

सम्बन्धित बुखँ

LEAVE YOUR COMMENTS