ने. सं. ११४४ कौलाथ्व तृतीया -

महानगर प्रमुख शाक्यपाखें कमलपुखू निरीक्षण

येँ- येँ महानगरपालिकाया प्रमुख विद्यासुन्दर शाक्यं कमलपुखूया पुनःनिर्माणय् जुयाच्वंगु ज्याया प्रगतियात कयाः असन्तुष्टि प्वंकादीगु दु । पुनःनिर्माणया ज्याया प्रगति असन्तुष्टि प्वंकादीम्ह येँ महानगर प्रमुख शाक्यं याकनं ज्या सिधयेकेत ठेकेदारयात निर्देशन नं बियादीगु दु ।

येँ महानगर प्रमुख शाक्यं पुनःनिर्माणया ज्या न्ह्यानाच्वंगु कमलपुखूया स्थलगत निरीक्षण यानादीगु खः । निरीक्षण इलय् पुनःनिर्माणया ज्या इलय् सम्पन्न मजूगु खँय् असन्तुष्टि प्वंकादिसें वय्कलं थुकिं यानाः प्रशासनिक व सामाजिकलिसें लागत नं अप्वइगु समस्या दुगु धासें इलय् ज्या सिधयेकेत ठेकेदारयात निर्देशन बियादीगु खः ।

येँ महानरपालिका वडा नं. १या वडाअध्यक्ष भरतलाल श्रेष्ठ, सहरी पूर्वाधार विभागया इन्जिनियर प्रेम श्रेष्ठ लगायतया अधिकारीलसें कमलपुखूया निरीक्षण यायेत झायादीम्ह प्रमुख शाक्यं पुनःनिर्माणय् खने दयाच्वंगु ढिलासुस्तीप्रति सचेत यासें निर्माण कम्पनीयात पटक पटक म्याद थप मयायेगु खँय् नं सचेत यानादीगु खः ।

जय धनञ्जय कँडेल निर्माण सेवा जेभीया प्रतिनिधि इन्द्र सिटौलायात इलय् ज्या सिधयेकेत निर्देशन बियादिसें महानगर प्रमुख शाक्यं धयादिल, ‘पटक पटक म्याद थप यायेगु ज्या जुइमखु । ज्याया प्रगतिया विवरण बियादिसँ, डिजाइन स्वयां छुं भचा नं उखे थुखे जुल धाःसा उकिया मान्य जुइमखु ।’

पुनःनिर्माणया ज्याय् गुलि ईया दुने गुलि प्रगति जुल धइगु खँय् थम्हं हे विश्लेषण यायेगु जुइ धासें वय्कलं थःत तत्काल परिणाम आवश्यक जूगु धयादीगु दु ।

महानगर प्रमुख शाक्यया असन्तुष्टि लिपा ठेकेदार कम्पनीया प्रतिनिधि सिटौलां चैत दुने निर्माण सम्पन्न यायेगु लक्ष्य दुगु खःसां ज्यामितय् नखःचखःया कारणं छुं भचा ढिलासुस्ती जुयाच्वंगु जानकारी याकादीगु खः । ८५ प्रतिशतं मल्याक ज्या सिधयेधुंकूगु पुखू पुनःनिर्माणय् फिनिसिङ व मतया ज्या ल्यं दनिसा पुखुलिइ करिब २० लाख लिटर लः नं जायकेधुंकूगु दु । पुखू छगुलिं लः जायेकेत करिब २ करोड ५० लाख लिटर लः आवश्यक जुइ ।