ने. सं. ११४४ ञलाथ्व नवमी -

खुम्बुइ हिमताल तज्याःगु आशंका

येँ (नेपालभाषा टाइम्स)- सोलुखुम्बुया खुम्बु पासाङल्हामु गाउँपालिका–५ थामेय् म्हिगः न्हिनय् आकाझाकां वःगु खुसिबालय् लानाः आपालं छेँ डुबे जूगु दु । उगु लागाय् च्वापुया चलः वनाः तसकं खुसिबाः वःगु खः ।

्उरकी लानाः नीखा छेँय् ल्हाःगु दुसा आः तक मानवीय क्षति जूगु जानकारी धाःसा मवःनि । सोलुखुम्बुया प्रमुख जिल्ला अधिकारी देवी पाण्डे खत्रीया कथं उकी लाःपिं खुम्ह मनूया उद्धार याःगु दु । उमित नेपाली सेनापाखें उद्धार याःगु खः । म्हिगः न्हिनय् २ बजेपाखे आकाझाकां वःगु खुसिबालं स्वखा छेँ व छगू छात्रावास चुइका यंकूगु खँ नं वय्कलं कनादीगु दु ।

गाउँपालिकाया प्रमुख प्रशासकीय अधिकृत जगतप्रसाद भुसालं बिउगु जानकारी कथं चलः वंगु थासय् च्वंपिं मनूतय्त म्हिगः हे सतिक लाःगु गुम्बाय् तयेयंकूगु दु । च्वापुया चलः लिपा दूधकोशी खुसिइ तसकं बाः वःगु खः । खुसि बाः वयाः झिंनिखा छेँ व होटेल चुइका यंकूगु दु । छम्ह स्थानीय वासिन्दा बेपत्ता जुयाच्वंगु दुसा न्हय्म्हेसित उद्धार याःगु दु । उगु थासय् होटेलत दुगु खःसा अफ सिजन जूगुलिं होटेलय् गेष्ट धाःसा सुुं मदुगु खः ।

अनया खुसिइ थथे आकाझाकां गथे खुसिबाः वल धइगु खँ धाःसा तिफ्याये मफुनि । थामे खुसिया च्वय्पाखे च्वंगु हिमताल तज्यानाः वा गुगुं पहाड कुतुं वयाः खुसि पना बिउगु व वयां लिपा खुसिबाः वःगु अनुमान पाउँपालिकाया प्रवक्ता लाक्पा छिरी शेर्पां यानादीगु दु । मुक्कं थामेय् खुसिबाः वःगुलिं अन मेगु न्हय्खा छेँय् जोखिमय् लानाच्वंगु दु ।

थ्वहे झ्वलय् गृह मन्त्रालयं म्हिगः हे खुसिया क्वय्या लागाय् च्वंपिं मनूतय्त सतर्क जुइत इनाप याःगु दु । लिसें अन मालेज्या यायेत व उद्धार एवं विपद व्यवस्थापनया नितिं नेपाली सेना, सशस्त्र प्रहरी व नेपाल प्रहरीयात परिचालन यायेत निर्देशन बिउगु दु ।

उगु लागाया हिमताल तज्याःगु खःसा गुगु हिमताल जुइमाः धकाः नं अनुमान याये फुगु मदुनि । आपालं हिमतालत दुगु थ्व लागाय् मेमेगु नं हिमतालत थथे हे तज्यात धाःसा थुकिं अझ तःधंगु विनाश हयेफु धकाः स्थानीय जनता चिन्तित जुयाच्वंगु दु ।