कोलोराडोय् मस्तय्त यःमरि दयेकेगु स्यनाः नखः हन

येँ(नेपालभाषा टाइम्स)- अमेरिकाया कोलोराडोय् च्वंपिं नेवाःतय््सं नं नेवाःतय् मौलिक नखः यःमरि पुन्हि तःजिक हंगु दु । कोलोराडो नेवाः खलःया ग्वसालय् ब्रुमफिलय् च्वंगु होटल दरवारय् उगु ज्याझ्वः जूगु खः ।

खलःया नायः भूषणलाल श्रेष्ठया सभापतित्वय् न्वकु मनोजकाजी तुलाधरं लसकुस यानादीगु ज्याझ्वलय् कोलोराडाय् च्वंगु आपालं थीथी संघसंस्थाया पदाधिकारी, समाजसेवी, बुद्धिजीवि, कलाकार, पत्रकारलिसें सर्वसाधारणया उपस्थिति दुगु खः ।

खलःया नायः श्रेष्ठ व मूछ्याञ्जे संजय शाक्यं यःमरि पुन्हिया महत्व व थुकिया इतिहास बारे कनादीगु ज्याझ्वलय् सुरेन्द्र महर्जन, मनोजकाजी तुलधर, सुरेश श्रेष्ठ, सुरेश ताम्राकार लगायतया कलाकारं यःमरि पुन्हिलिसे स्वापू दुगु व मेमेगु म्येँ हालाः न्यंकादीगु खः । अथे हे ज्याझ्वलय् मंगलधुन, धिमय् लिसें थीथी सांस्कृतिक ज्याझ्वः नं न्ह्यब्वःगु खः ।

न्हू पुस्तायात शीप हस्तान्तरण यायेगु ल्याखं मस्तय्त नं यःमरि दयेकेगु स्यनेज्या याःगु खःसा मस्तय्सं नं उत्साहपूर्वक यःमरि दयेकेगु ज्याय् ब्वति काःगु खलकं जानकारी बिउगु दु । थुकथं यःमरि दयेकेगु व थुगु ज्याय् ग्वाहालि याःपिं अभिभावकपिंत थीथी संघसंस्थाया पदाधिकारी, गन्यमान्य व्यक्तिलिसें खलःपाखें थीथी सिरपाः नं देछाःगु खः । उगु इलय् मायःबायः, गणेद्यः, कुवेर आदि दयेकाः ब्वज्या नं याःगु खः ।

ज्याझ्वः ताःलाकेत थःथःगु थासं ग्वाहालि यानादीपिं सकसितं सुभाय् देछानादिसें खलःया नायः श्रेष्ठं थःगु देशं तापाक च्वनाः नं थःगु रहनसहनलिसें कला, संस्कृति, तजिलजि थः मस्तय्त स्यनेकने मयायेगु खःसा थुकिं झीगु संस्कृति जक तना वनीगु मखसे झीगु म्हसीका नं ल्यनाच्वनीमखु धयादिल ।

उगु हे ज्याझ्वलय् बुद्ध जन्मस्थल लुम्बिनीइ निर्माण जूगु बौद्ध विहारय् निर्माणाधीन गेष्ट हाउसय् देश विदेशय् च्वंपिं सकल नेपाःमिपिनिगु अपनत्व दयेमा धइगु ल्याखं छगू क्वथा निर्माण निंतिं खलःयात प्रस्ताव वःगुलिं थ्व अभियानय् ग्वाहालि यानादीत नं वय्कलं इनाप यानादीगु खः ।