सक्वया भाषासेवी राजदास श्रेष्ठ मंत

येँ । सक्वय् च्वनाः नेपालभाषाया सेवा याना च्वनादीम्ह नांजाःम्ह साहित्यकार लिसें समाजसेवी इन्जिनियर राजदास श्रेष्ठ थौं विहीवाः सुथय् मंत । वय्कःयात वंगु छवाः न्ह्यवंनिसें सक्वया सुष्मा कोइराला मेमोरियल अस्पतालय् वासः याकातःगु खः थौं सुथय् वासः याकुयाकुं मदुगु खः ।
भाजु श्रेष्ठ ७६ दँ दुम्ह खः । पारिवारिक सूत्रं धाःकथं वंगु चैत्र ७ गते सुथय् वय्कलं विष सेवन यानादीगु खः । वयां लिपा अशक्त जूम्ह वयकःयात अस्पताल भर्ना याःगु खः । अस्पताल भर्ना यासांनिसें वयकः अचेत जुयादीगु खःसा बेहासी अवस्थाय् हे वयकःया निधन जूगु खँ धाःगु दु ।
वयकलं विष सेवन यानादीगुया कारण धाःसा सी मदुनि । प्रहरीं वयकःया छेँय् छानबिन याःगु व अन वयकःया सुसाइड नोट नं लूगु खँ धाःगु दु । प्रहरीं उकिया विवरण धाःसा बिउगु मदुनि ।
वयकःलिसे सतीपिं भाषिक कार्यकर्तातयसं धाःकथं वंगु छुं ई न्ह्यवंनिसें वयकलं थःत आर्थिक समस्या जूगु खँ कनेगु यानादीगु खः । उकिया लागिं वयकलं थःगु जग्गा मीगु नं कुतः यानादीगु खः ।
छुं दँ न्ह्यवंनिसें वयकः सक्वया छेँ त्वःताः चौकी भञ्ज्याङ धाःगु थासय् एकान्त व रमणीय छेँ दनाः च्वनेगु यानादीगु खः । स्वीमिङ पुल समेत दुगु व प्यखेरं कृषि यानातःगु उगु छेँय् वयकलं नेपालभाषाया साहित्यकारपिंत नं इलय् ब्यलय् ब्वनेगु यानादी । वहे छेँय् वयकलं थुगुसी महाकवि गिरिजाप्रसाद जोशीया बुन्हि हनेगु ग्वसाः समेत यानादीगु खः । वयकः महाकवि जोशीलिसे तसकं सतीम्ह साहित्यह्यमि खः ।
मदुम्ह श्रेष्ठया सीम्हयात थौं पोष्टमार्टमया लागिं टिचिङ अस्पताल यंकूगु दु । अनं लिपा थौं हे पशुपति आर्यघाटय् अन्तिम संस्कार याइगु खँ पारिवारिक स्रोतं धाःगु दु । वयकःया निम्ह कायपिं मध्ये तःधीम्ह काय् येँय् थ्यंकः वयेधुंकूगु दु । वयकलं निक्वः इहिपा यानादीगु खःसां वयकःया निम्हं जहानपिं मदयेधुंकल ।