छम्ह सचिवया शक्ति !

येँ (नेपालभाषा टाइम्स)- म्हीग आकाझाकां नेपाः वःम्ह भारतीय विदेश सचिव विक्रम मिश्रीं येँय् थ्यनाखतं हे राष्ट्रपतिंनिसें प्रधानमन्त्री, विपक्षी दलया नेता लिसें ग्वाःग्वाः मन्त्रीतय्त नापलानाः हानं छक्वः नेपाः–भारत दथुया असन्तुलित कुटनीतिक स्वापूया नमूना ब्वयादीगु दु । कुटनीतिक ख्यःया विज्ञतय्सं थुकियात ‘चमत्कार’ हे धाःसां जिउगु टिप्पणी समेत यानाहःगु दु ।

‘नियमित भ्रमण’ य् वःम्ह विदेश सचिव मिश्रीं म्हीग राष्ट्रपति, प्रधानमन्त्री नापं विपक्षी दलया नेता नापलानादीगु खःसा म्हिगः उप्रधान लिसें शहरी विकास मन्त्री, गृहमन्त्री, अर्थमन्त्री, परराष्ट्रमन्त्रीयात नापलानादीगु खः । लिसें पुलांम्ह प्रधानमन्त्री माधव नेपालयात तकं वय्कलं म्हिगः हे नापलानादिल ।

विदेश सचिव मिश्रीयात नेपाः भ्रमणया लागिं निम्तो बियादीम्ह नेपाःया परराष्ट्र सचिव सेवा लम्सालयात धाःसा वय्कलं म्हिगः दकलय् अन्तिमय् नापलादीगु खः । लम्साल नापलायेधुंकाः वय्कः म्हिगः हे स्वदेश नं लिहां झाल ।

नेपाः वयाखतं विदेश सचिव मिश्रीं थनया तुंछेँ गल्लिइ झायाः नेपालभाषा परिषद्या छेँ उलेज्या यानादीगु खः । वय्कः उलेज्याया लागिं वःबलय् नं अतिकं कडा सुरक्षा व्यवस्था याःगु खः ।

विदेश सचिव मिश्रीयात नेपाःया परराष्ट्र सचिवं छुं ई न्ह्यः हे नेपाः वयेत ब्वनातःगु धाःसां मिश्री नेपाः वइगु समाचार धाःसा शनिवाः तिनि सार्वजनिक जूगु खः । मुक्कं निन्हुया लागिं नेपाः वःम्ह भारतीय विदेश मन्त्रालयया छम्ह उच्चस्तरीय कर्मचारीया लागिं नेपाःया राष्ट्रपतिंनिसें प्रधानमन्त्री, मन्त्री व फुक्कं शीर्ष नेतातय्सं ई मिले याःगु खः । परराष्ट्र मामिलाया विज्ञतय्सं धाः कथं नेपाःया परराष्ट्र सचिव भारत वन धाःसा वयात अन थज्याःगु सुविधा दइ मखु । नेपाःया सचिवं मुश्किलं मन्त्री तक नापलाःसा खः, प्रधानमन्त्री नापलायेगु ला सम्भव हे मदु ।