बसन्तपुली सत्याग्रह

येँ (नेपालभाषा टाइम्स) – १२ बुँदे सहमति कार्यान्वयन माग यासें ल्याय्म्हतय्सं म्हिगः निसें बसन्तपुलीं सत्याग्रह शुरु याःगु दु। ‘इनफ इज इनफ’ अभियानय् दुथ्याःपिं ल्याय्म्हतय्सं म्हिगः १२ बजे निसें सत्याग्रह शुरु याःगु खः ।

खुला सत्याग्रह नां बियाः न्ह्याकूगु अनसनय् इच्छा दुपिंसं थःगु लाःगु इलय् तक च्वनेफइगु खँ अभियन्ता ‘ईं’ नेपालभाषा टाइम्सयात कनादीगु दु। वय्कःया कथं सरकारं छुं छुं माग पूवंकूगु खःसां आपालं माग धाःसा पूमवंकूगुलिं हाकनं सत्याग्रह आन्दोलन न्ह्याकूगु खः ।

लः तकं मत्वंसे न्ह्याकूगु सत्याग्रहय् अभियन्ता ‘ई’ धाःसा अनिश्चिकालीन सत्याग्रहय् च्वनेगु खँ धयादीगु दु। अभियन्तातय्सं पीसीआर परीक्षणया दायर अप्वयेकेमाःगु, क्वारेन्टाइनयात अझ अप्वः व्यवस्थित यायेमाःगु माग यानावयाच्वंगु दु ।

थ्व स्वयां न्ह्यः ‘ई’ व पुकार बम झिंनिन्हु तक आमरण अनसन च्वंगु खः । वयां लिपा स्वास्थ्य तथा जनसंख्या मन्त्रालयसं १२ बुँदे सहमति याःगु खः । सरकारं सहमति कार्यान्वयन मयाःगु धासें हाकनं सत्याग्रह न्ह्याकेमाःगु खँ धाःगु दु ।