नेवाः संगीत ख्यःयात अन्तर्राष्ट्रिय ख्यलय् थ्यंकेमाः – दिपा महर्जन

दिपा महर्जन म्हसीका च्वनेमाःगु नां मखु । थःगु सुमधुर सःया कारणं स्वनिगः नापं स्वनिगलं पिने उतिकं लोकंह्वाःम्ह गायिका खः । वय्कः थौंकन्हय् वइगु वैशाख २२ गते शनिवाः जुइगु छगू विशेष शोया निंतिं थःगु तन, मन व धन बियाः लगे जुयाच्वनादीगु दु ।

‘लाइभ म्युजिक इभिनिङ’ नामं होटेल याक एण्ड यतिइ जुइगु ज्याझ्वलय् वय्कः मू गायिका जुयाच्वनादीगु दु । उकिं वय्कः तसकं लिमलाः फमलाः उकिंया तयारी लगे जुयाच्वनादीगु दु । अन हालेगु म्ये तयारीया लागिं न्ह्याथाय् हे वंसां ध्यान मग्न जुयाच्वनादीगु दु । वय्कलं धयादी, ‘जिं थुलि तयारी शायद हे जक मेमेगु इभेन्टया निंतिं यानागु दु जुइ ।’

थ्व वय्कःया निंति हाथ्याः व अवसर नं जुयाच्वंगु दु । नेवाः ख्यलय् न्हापांखुसी पाँचतारे होटेल जुइगु शोया तयारी यानाच्वनादीम्ह वय्कलं थःगु म्येयात आः अन्तर्राष्ट्रिय ख्यलय् तकं थ्यनीगु विश्वास प्वंकादीगु दु । सुखावति मल्टि प्रोडक्सन थेंज्याःगु क्वातुगु संस्थाया ग्वसालय् जुइत्यंगु जूगुलिं नं वय्कः तसकं उत्साहित जुयाच्वनादीगु दु ।

दिपां वैशाख २२ गते शनिवाः मुक्कं झिंप्यपु म्ये न्यंकादी । उकी न्हय्पु नेपालभाषाया म्ये व न्हय्पु खस् नेपाली भाय्या म्ये जुइ । नेपालभाषाया म्ये हालाः थःगु म्हसीका दयेकादीम्ह वय्कलं थुगुसी धाःसा न्हापांखुसि खस नेपाली भाय्या लाइभ म्ये न्यंकादीत्यंगु दु । वय्कलं थ्व शोयात खस नेपाली समुदाय दुने नं थःगु प्रतिभा न्ह्यब्वयेगु सुरुवात कथं कयाच्वनादीगु दु । थ्व छगू वय्कःया निंतिं न्हूगु हे प्रयोग धाःसां छुं पाइमखु ।

नेवाः ख्यलय् न्हापांखुसी पाँचतारे होटेल जुइगु शोया तयारी यानाच्वनादीम्ह दीपां थःगु म्ये आः अन्तर्राष्ट्रिय ख्यलय् तकं थ्यनीगु विश्वास यानादीगु दु

खास ला थ्व ज्याझ्वः दिपा याकःचिगु हे जक खः । तर वय्कःयात साथ बीत नांजाःम्ह हास्य कलाकार व गायक मदनकृष्ण श्रेष्ठं नं अन म्ये न्यंकादी । लछि न्ह्यः ललित मलय् जूगु पत्रकार सम्मेलनय् मदनकृष्ण श्रेष्ठं थःम्हेसिनं छपु नेपालभाषा व छपु खस् नेपाली म्ये हालेगु वचन बियादीगु खः । तर दुःखया खँ थ्व हे दथुइ वय्कःया तिरिमय्जु यशोधा तिमिल्सिनां थ्व संसार त्याग यानादिल ।

ग्वसाः खलः सुखावती मल्टि प्रोडक्सनपाखें म्हतिं न्याद्वः व स्वद्वः दां कयाः बेलि भ्वय् सहित थ्व इभेन्ट ग्वसाः ग्वयाच्वंगु खः । न्हापा न्हापा नं थीथी कथं सांगीतिक ज्याझ्वः यानाः थीथी सामाजिक संघसंस्थाया लिसें सुं पीडित दुसा उमित आर्थिक ग्वाहालि यानाच्वंगु थुगु संस्थां थ्व पालय् नेवाः कलाकारतय्गु निंतिं स्वास्थ्य सेवा कोष नीस्वनेगु ताः तयाः थ्व इभेन्ट यायेत्यंगु खः ।

सुखावती मल्टि प्रोडक्सनया अध्यक्ष सुरेन्द्र तुलाधरं थुगु ज्याझ्वलं थःपिं न्ह्याक्वः हे द्याःसां त्याःसां छगू लाख तका दां उकुन्हु हे कोषय् तयाः कोषया उलेज्या यायेगु ग्वसाः जुयाच्वंगु खँ कनादिल । नेपाली आय श्रोतया तुलना यायेगु इलय् न्याद्वः व स्वद्वः धइगु अवश्य नं थिकेगु हे टिकट खः ।

कलाकार व गायिका दिपा महर्जन स्वयमं थ्व टिकट दर नेपालीतय्गु निंतिं थिकेगु हे खःसां थ्व छगू अन्तर्राष्ट्रिय स्तरया इभेन्ट जुइगु खँ कनादिसें आः नेवाःत नेवाः ख्यलय् जक लिकुना च्वनेगु मखुसे थुकियात आः अन्तर्राष्ट्रियकरण याना वनेमाःगु खँ कनादिल । वय्कलं धयादिल, ‘सामान्य मनूतय् निंतिं न्याद्वः तूगु टिकट धइगु थिकेगु खः, तर असामान्य उद्देश्य ज्वनाः ज्या यानाच्वंगु संस्थां थ्व टिकट नं अःपुक हे मीगु विश्वास दु ।’

पाँच तारे होटेलय् डिनर सहितया ज्याझ्वः जूगुलिं नं थ्व टिकट भाः उलि थिकेगु मजुइगु वय्कःया दावी दु । थ्व ज्याझ्वः सुयागुं सम्पत्ति अप्वयेकेत वा संस्था तःमि यायेत मखुसे मुक्कं उठे जूगु दां मध्ये छुं दां क्वपालाः संस्थागत रुपं हे नेवाः कलाकारतय्त हे आर्थिक ग्वाहालि यायेगु ताः तयाः हे यायेत्यनागु ग्वसाः खलःया धारणा दु ।

कलाकार दिपा महर्जनं थपे यानाः कनादी कि थ्व इलय् नेवाः कलाकारतय्सं गर्व यायेगु ई चूलायेत्यंगु दु । पाँच तारे होटेलय् हे नेवाःतय्सं न्हापांखुसि थुलि च्वन्ह्याःगु इभेन्ट यायेत्यंगु कारणं माल धाःसा झीसं नं दर्शक व श्रोतातय्त प्रभावित याना यंकेफु धइगु धारणा न्ह्यब्वयेत नं थ्व ज्याझ्वः महत्वपूर्ण जुइगु खँ वय्कलं कनादिल । थ्व ज्याझ्वः नेवाः कलाकार कोष दयेकेगु न्हापांगु कुतः धाःसा मखु ।

थ्वयां न्ह्यः नं सुखावती मल्टि प्रोडक्सनं बारम्बार संगीत ख्यःया महारथीत हयाः शो यायेधुंकूगु दु । थ्व ज्याझ्वः दिपा महर्जनया एकल शो खः । थःगु प्रस्तुति ग्यसु ग्यंक न्ह्यब्वयेत कलाकार व संगीत साधक दिपा मजर्हनं थःम्हेसिनं न्हापा न्हापा हाला तये धुंकूगु तसकं चर्चितगु म्ये हे जक ल्ययादीगु दु । तर वय्कः थ्व इलय् थःम्हेसिनं क्वातुगु प्रस्तुति बिइ मफुत धाःसा छु जुइ गथे जुइ धइगु हे ग्वाचिकुं साधानाय् मग्न जुयाच्वंगु दु ।

मुक्कं न्हय्पु नेवाः म्ये मध्ये वय्कलं न्हापा न्हापा थःम्हेसियां हे हालाच्वंगु म्ये व छपु ज्वः म्ये नं हालादी । उकी थःगु हे एल्बम, पानवती संकिपाया म्ये न्यंकादी । जनकवि दुर्गालाल श्रेष्ठं च्वयादीगु छपू म्ये नं उगु हे इभेन्टय् न्यंकादी । थ्व म्यें वय्कःयात नं आनि छोइङ डोल्मायात थें दुर्गालालया म्ये हालीम्ह गायिका धकाः म्हसीका बीगु सम्भावना नं खनेदु ।

खस नेपाली भाय्या म्ये मध्ये नांजाःम्ह साहित्यकार पारिजातया कृति ‘शिरिसको फूल’यात कयाः दयेकाच्वंगु फिल्म म्ये नं वय्कलं न्यंकादी । थ्व ज्याझ्वलं उठे जूगु ध्यबाः छगू अक्षय कोष नीस्वनाः उगु कोषपाखें नेपालभाषा ख्यःया कलाकारतय् स्वास्थ्योपचारय् आवश्यक जुल धाःसा दां ग्वाहालि बीगु याइ ।

थुकिया निंतिं ज्याझ्वः जुइकुन्हु हे याक एण्ड यतिइ नांजाःपिं हास्य कलाकारद्वय मदनकृष्ण श्रेष्ठ व हरिवंश आचार्यया ल्हातिं छगू लाख दांया अक्षय कोषया उलेज्या याइ । थुगु ज्याझ्वःया निंतिं नीगू लाख खर्च तुइगु सुखावती मल्टि प्रोडक्शनं धाःगु दु ।