लाइभ शोलय् ल्हाः वायेवं

छुं दिं न्ह्यः जक नेपाःया छगू टेलिभजन च्यानलय् खँल्हाबल्हा जुयाच्वँच्वं हे ज्याझ्वःया प्रस्तोता व छम्ह नेताया दथुइ चर्काचर्की बहस जूगु व लिपा नेतां माइक हे वांछ्वयाः स्टुडियो नं पिहां वःगु घटना सामाजिक संजाल व नेपाःया संचारमाध्यमय् तसकं चर्चाय् वःगु खः ।
थज्याःगु हे छगू घटना पाकिस्तानया टेलिभिजन च्यानलय् नं छुं दिं न्ह्यः जूगु दु ।

पाकिस्तानी टेलिभिजनय् जूगु घटना ला नेपाःया घटना स्वयां नं तच्वः । छाय्कि ज्याझ्वलय् ब्वनातःपिं पाहांपिनि दथुइ चर्काचर्की बहसया दथुइ ल्हाः वानाः ल्वापुतकं जूगु खः । छम्हेसिनं मेम्हेसिन थसः पायेक घ्वाना छ्वःगु खः । पाकिस्तानया ‘के २१ न्युज’ च्यानलय् प्रशारण जुइगु ‘न्युज लाइन विद आफताब मुघेरी’ नांया छगू लाइभ शो जुयाच्वंगु खः ।

‘प्यानल डिस्कसन’कथं न्ह्यानाच्वंगु टेलिभिजन लाइभ शोलय् सहभागि छम्ह नेतां छम्ह पत्रकारयात थसः पायेक घ्वानाछ्वःगु खः ।प्यानल डिस्कसनय् पाकिस्तानया सत्ताधारी पार्टी पाकिस्तान तहरिक ए इन्साफ (पीटीआई)या नेता मसरुल अली सियाल व कराची प्रेस क्लबया प्रमुख इम्तियाज खानया दथुइ मतभेद जुइवं न्हापां ला म्हुतु म्हुतुं हे जक भनाभन जुयाच्वंगु खः ।

लिपा थुगु विषयं उग्र रुपं कायेवं ल्हाः हे तयेमाःगु अवस्था ब्वलन । निम्हेसिया दथुइ विवादया झ्वलय् न्हापां पीटीआई नेता सियालं मेचं हे कुतुं वंक पत्रकार खानयात घ्वाना छ्वःगु खः । वयां लिपा पत्रकार खान नं प्रतिकारय् कुहां वयेवं टेलिभजनया कर्मचारीत हे वनाः निम्हेसित छिनेमाःगु खः ।

सियाल व खानया दथुइ ल्हाः हे वानाः ल्वापु जुइवं ज्याझ्वःया प्रस्तोता माइक हे वां छ्वयाः इमित छिनेत न्ह्यःने वःगु खःसा डिस्कसनय् ब्वति कायेत वयाच्वंम्ह मेम्ह छम्ह सहभागि नं थःगु माइक त्वःताः बिसिउँ वंगु खः ।थुगु घटना लिपा पाकिस्तानया प्रधानमन्त्री इमरान खानया पार्टीयात कयाः गाक्कं आलोचना जुयाच्वंगु दुसा उगु शोया भिडियो नं भाइरल जुयाच्वंगु दु ।

सम्बन्धित बुखँ

LEAVE YOUR COMMENTS