स्वनिगःया थाय्थासय् डुबान, सरकारी ज्याकुथिइ नं लः

येँ (नेपालभाषा टाइम्स)÷ सोमवाः सनिलंनिसें मंगलवाः सुथबःछि वःगु वां यानाः स्वनिगःया तःगू थाय् डुबानय् लाःगु दु । वाः वया स्वनिगःया मू मू लँपु लिसें थीथी सरकारी ज्याकुथिइ नं लः दुहां वंगु खः । मूमू लँपुइ हे लः जायेवं गाडीयात तकं वये–वनेत समस्या जूगु खः । वा वयाः थीथी थाय्या स्कूलय् नं लः दुहां वनेवं स्कूल तकं बन्द यायेमाःगु खः । मदिक्क वा वःगु कारणं सिंहदरबारय् च्वंगु नेपाली कांग्रेसया संसदीय ज्याकुथिइ तकं लः दुहां वंगु दु ।

चच्छि न्हिछि वा वःबलय् बबरमहल, माइतीघर, पुतलीसतक, लैनचौर, सोल्टीमोड, स्वयम्भू, सानो भ¥याङ, ठुलो भ¥याङ, डल्लु, चागः विष्णुमति करिडोर, सिंहदरबार दुने नेपाली कांग्रेस संसदीय दलया ज्याकू, चःमति, राष्ट्रिय विमा संस्थान, बल्खु तरकारीबजाः आदि डुबानय् लाःगु दु । अथेहे यल गाःबहाः, नःत्वा, किस्ट मेडिकल कलेज, हात्तिवन, बनेपाया पुलबजार क्षेत्र नं डुबानय् लाःगु दु ।
या लिसें बागमति करिडोरया थीथी थासय् लः मुनाः गाडी यंकेत तकं समस्या जूगु खः । सतकय् लः मुनेवं गाडी यंकेमफयाः थाय्थासय् ट्राफिक जाम जूगु दु ।

माइतीघर रामशाहपथय् लाःगु सर्वोच्च अदालतया मू लुखा न्ह्यःने हे लः जायेवं अदालतय् वनीपिं सेवाग्राहीत प्रभावित जूगु दु । मंगलवाः सुथय् लैनचौरय् च्वंगु नीति अनुसन्धान प्रतिष्ठान कार्यालय (राहदानी विभागया पुलांगु ज्याकू) लिसें नारायणहितिइ च्वंगु राष्ट्रिय परिचयपत्र तथा पञ्जीकरण विभाग, नेपाल पञ्चांग निर्णायक समितिया ज्याकु, नेपाल प्रतिलिपि अधिकारी रजिष्ट्रार कार्यालय, नेपाल प्रहरीया नारायणहिति सुरक्षा गुल्म लः दुहां वंगु दु ।

अथेहे सोमवाः व मंगलवाः वःगु वां यानाः नेकपा एमालेया बल्खुस्थित मू ज्याकू नं डुबानय् लाःगु दु । एमालेया मूज्याकुथिइ लः दुहां वंगु थ्व दँय् जक हे स्वक्वःगुखुसी खः । मनहरा खुसि बाः वयाः एमाले ज्याकू लिसें लाःगु एन्फाया फुटबल मैदान, मनहरा करिडोरया सतकय् नं डुबानय् लाःगु खः ।