विधेयक विरुद्ध मैनमत च्याकाः जुलुस
विपक्षी पार्टीया नेतातपाखें विरोध
येँ (नेपालभाषा टाइम्स)÷ नेपाली कांग्रेस व राष्ट्रिय जनता पार्टी (राजपा) या सांसदपिंसं मंकाः कथं गुथि सम्बन्धी विधेयक लित कायेमाःगु माग यासें सरकारया ध्यानाकर्षण याकूगु दु । प्रतिनिधिसभाया म्हिगः च्वंगु बैठक न्ह्यायेवं सांसदपिंसं विधेयक लित कायेमाःगु माग यासें स्वनिगःया गुथिया गुथियारपिंसं आन्दोलन न्ह्याकूगु व आन्दोलनकारीया माग पूवंकेत इनाप यानादिल ।
कांग्रेसया नेता लिसें सांसद प्रकाशमान सिंहं गुथि सम्बन्धी विधेयकयात सरकारं लित कयाः सरोकार निकायलिसे सहलह यानाः परिमार्जन यायेत ध्यानाकर्षण यानादिल । संसदय् न्ववायेगु झ्वलय् सांसद सिंह प्रस्ताविक विधेयकया पुस्तौं पुस्तानिसें न्ह्याना वयाच्वंगु निजी गुथियात सार्वजनिक गुथिलय् रुपान्तरण यानाः प्राधिकरण सञ्चालन यायेत्यंगु आपत्तिजनक जूगु खँ कनादिल ।
वय्कलं धयादिल, ‘विधेयक सरोकारवाला निकाय लिसेया सहलह मयायेसे छाय् हल ? थुकिं निद्वः स्वयां अप्वः गुथि प्रभावित जुइ, विधेयक संविधान विपरित दु, धार्मिक स्वतन्त्रता अःखः दु, अथे जुयाः जिं विधेयक लित कायेत माग यानाच्वना ।’
अथे हे सांसद अनिलकुमार झां सरकारं हःगु गुथि सम्बन्धी विधेयक लित कायेमाःगु माग यानादिल ।वय्कलं गुथि धर्म संस्कृति रक्षा यायेत महत्वपूर्ण भूमिका म्हिता वयाच्वंगु धासें विधेयक लित कायेमाःगु माग यानादीगु खः ।
धरानय् नं ¥याली ः
थ्वहे झ्वलय् म्हीग सरकारं संसदय् हःगु गुथि विधेयक लित कायेमाःगु माग यासें धरानय् नं विरोध ¥याली पिहां वःगु दु । गुथि विधेयक तत्काल खारेज यायेमाःगु माग यासें संघीय लोकतान्त्रिक राष्ट्रिय मञ्च सुनसरी जिल्ला समितिया नेतृत्वय् विरोध ¥याली प्रदर्शन जूगु खः ।
¥याली लिपा भाजुचोकय् जूगु कोणसभाय पार्टीया थीथी नेतापिंसं सम्बोधन याःगु खः । गुथि सम्बन्धी येँ जुयाच्वंगु आन्दोलय् नं मञ्चं ब्वति कया वयाच्वंगु जानकारी नं अन बिउगु खः ।
येँय् तःधंगु ¥याली
अथे हे म्हिगः येँया बसन्तपुरया दमकल न्ह्यःने मैनमत, मोबाइल टर्च लाइट जुलुस पिकाःगु दु । राष्ट्रिय पहिचान संरक्षण संयुक्त संघर्ष समितिया ग्वसालय् पिहां वःगु जुलुस येँया थःने क्वने चाःहिलाः न्हूसतकय् थ्यंकाः क्वचाःगु खः । जुलुसय् थीथी नारा च्वयातःगु प्लेकार्ड ब्वयावःगु खःसा प्लेकार्डय् ‘गुथि जिमिगु म्हसिका खः, म्हासे याये दइमखु, सरकारं छंगू पारा, दुःख सिल सारां’ धइगु नारा च्वयातःगु खः ।
नेवाः मुस्मांतय् नं विरोध ः
थ्वहे झ्वलय् थौं विधेयकया विरोधय् नेवाः मुस्लिम समाजं थौं वंगलय् प्रदर्शन यायेत्यंगु दु । समाजं थौं १२ बजे निसें १ बजे तक मौन प्लेकार्ड प्रदर्शन यायेत्यंगु खँ समाजया नायः नासिद मुद्दिनं ‘नेपालभाषा टाइम्स’ यात कनादीगु दु । प्रदर्शनय् धर्म संस्कृति सम्बन्धी प्लेकार्ड दइ धाःगु दु ।
LEAVE YOUR COMMENTS