किपुली साहित्य नखःया ‘रिहर्सल’

येँ – स्वक्वःगु नेपालभाषा साहित्य नखःया रिहर्सल, तयारी व प्रचार प्रसारया झ्वलय् किपुली बःचाधंगु ‘किपु नेपालभाषा साहित्य नखः’ जुल । वइगु कछलागा १० व १२ कुन्हु येँय् प्रज्ञा भवन कमलादीइ जुइगु साहित्य नखःयात ग्वाहालि जुइ कथं थ्व ज्याझ्वः जूगु खः ।

साहित्य नखःया झ्वलय् न्हापांगु सेशन कथं किपुली पर्यटन विकासयात कयाः डा. चन्द्रमान वज्राचार्य व २ नम्बर वडाया वडाध्यक्ष रमेश डंगोलपिंसं न्ववानादीगु खः । थ्व झ्वलय् डा. वज्राचार्य किपुली पर्यटकीय रुपं विकास यायेगु खःसा सांस्कृतिक लागाय् तजाःगु छेँय् दनेगु दिकेमाः धयादिल ।

थीथी व्यक्तिपिंसं पर्यटकीय विकासयात कयाः न्यंगू न्ह्यसःया लिसः बियादिसें २ नम्बर वडाध्यक्ष डंगोलं किपूयात पर्यटकीय रुपं विकासया निंतिं नगरपालिकां थीथी योजना दयेकाच्वनागु खँ कनादिसें थःपिंसं सम्बन्धित विज्ञपिं लिसें जानाः किपूयात होमस्टे कथं विकास यायेगु योजना कथं ज्या जुयाच्वंगु खँ कनादिल ।

निगूगु सेशनय् जूगु ज्याझ्वलय् साहित्यकारपिंसं कविता वाचनया लिसें बाखं ब्वनेगु ज्या जूगु खः । ज्याझ्वलय् रजनी मिला, नवीनप्रकाश श्रेष्ठ, रुपा शाही, राजभाई जकःपि, शभ्मुराम महर्जन, दिलिप शाही, राजेन्द्र कुमार पुता, अर्जुन नेपाःमि, पूर्ण सागर, नरेन्द्र महर्जन, कुलबहादुर महर्जनपिंसं कविता ब्वनाः न्यंकादीगु खःसा राज साय्मि व लक्ष्मीकुमार महर्जनं बाखं ब्वनाः न्यंकादीगु खः ।

ज्ञानकुमार महर्जनं लसकुस यानाः न्ह्याःगु ज्याझ्वलय् नेपाल भाषा साहित्य नखःया अध्यक्ष नापं नेपालभाषा टाइम्स न्हिपौया कजि रमेशकाजी स्थापितं थ्व साहित्य नखतं स्वक्वःगु साहित्य नखः झःझः धायेकत ग्वाहालि याइगु विश्वास प्वंकादीगु खः ।

 

सम्बन्धित बुखँ

LEAVE YOUR COMMENTS