विमान दुर्घटनाय् थःथितिपिंसं सीम्ह बुझे मयाः

येँ (नेपालभाषा टाइम्स)- सरकार व सौर्य एयरलाइन्सं बीमाःगु क्षतिपूर्ति, बिमा लगायतया विषयय् क्वःमछिउगुलिं जहाज दुर्घटनाय् सीपिं आपालं धइथें थःथितिपिंसं सीम्ह बुझे यानाः कायेत अस्वीकार याःगु दु । म्हिगः उद्धव पुरी, अश्मिना निरौला, श्याम विन्दुकर, राजाराम आचार्य व को–पाइलट सुशान्त कटवालया छेँजःपिंसं जक सीम्ह बुझे यानाः काःगु खः ।

सीपिनि पोस्टमार्टम क्वचायेवं म्हिगः हे सीम्ह लःल्हायेगु धाःसां नं क्षतिपूर्तिया खँ धाःसा क्वमचाःनि । क्षतिपूर्तिया खँ क्वःमजिउगुलिं शिक्षण अस्पतालय् वयाच्वंपिं थःथितिपिंसं नं सीम्ह बुझे मयाःगु खः । गुलिखे थःथितिपिंसं सीम्ह स्वः वा धकाः सःताः जबर्जस्ती सीम्ह बुझे याःगु भ्वँतय् हस्ताक्षर याकल धकाः नं द्वपं बिउगु दु । म्हिगः फुक्कं सीपिनि पहिचान जुइधुंकूगु खँ त्रिवि शिक्षण अस्पतालया फरेन्सिक विभागया प्रमुख डा. गोपाल चौधरीं कनादीगु दु ।

वंगु बुधवाः ११ः११ बजे येँया त्रिभुवन विमानस्थलय् सौर्य एयरलाइन्सया जहाज दुर्घटना जुयाः झिंच्याम्ह सीगु खः । विमानया क्याप्टेन मनिषरत्न शाक्ययात धाःसा केएमसी अस्पतालय् वासः याकातःगु दु । वय्कःयात म्हिगः आइसियूपाखें पित हयाः क्याबिनय् तःगु दु ।

म्हीग एमआरआई यायेधुंकाः खास हे जटिलता खने मदुगुलिं क्याबिनय् सारे यानागु खँ केएमसीया डाइरेक्टर डा. मिना थापां कनादीगु दु । शाक्यया ख्वाः, मिखा, न्हाय्, छ्यनय् घाः जूगु खःसा जँया क्वँय् व स्वपु बपिक्वँय् त्वःधूगु खः । क्याप्टेन शाक्ययात चिकित्सकया प्रत्यक्ष निगरानीइ तयाः वासः याकाच्वंगु दुसा छेँजःपिंत बाहेक मेपिंत नापलाके बियाच्वंगु मदु ।