ने. सं. ११४४ कौलाथ्व पारू - नःलास्वनेगु

अस्ट्रेलियाया न्हूगु आप्रवासन नीति – नेपालीतय्त गज्याःगु लिच्वः लाइ

अस्ट्रेलियाया संघीय सरकारं हःगु आप्रवासी सम्बन्धी न्हूगु योजनां अन ‘अस्थायी भिसाय् च्वनाच्वंपिं’ व चीहाकः ईइा कोर्स कयाः ब्वनाच्वंपिं नेपालीतय्त अप्वः प्रभावित याइगु खँ अनया नेपाली समुदायया नेता व येँया शैक्षिक परामर्शदातातय् धापू दु ।

अस्ट्रेलियां वइगु निदँया दुने थःपिं स्वीकार यानागु विदेशी आप्रवासीतय् ल्याः बछि म्हो यायेगु योजना सार्वजनिक यायेधुंकूगु दु । जीवनयापनया निंतिं आवश्यक आः दुगु भौतिक पूर्वाधारं थेगे यायेमफइगु अवस्था वःगु धासें सरकारं आप्रावासीत म्हो यायेगु योजना हःगु खः ।

अस्ट्रेलियाया संघीय सरकारं सन् २०२५ या जुन महिना दुने देसय् दँय्दसं दुहां वयाच्वंपिं आप्रवासीतय् ल्याः निगू लाख ५० हजार म्हो यायेगु लक्ष्य तयातःगु दु । थ्व ल्याः धयागु कोभिड महामारी न्ह्यःया अवस्था थें खः ।

अस्ट्रेलियाया गृहमन्त्री क्लेर ओ’नीलं वंगु सोमवाः पत्रकार सम्मेलन यानाः आप्रवासन सम्बन्धी झिदँया योजना सार्वजनिक याःगु खः । न्हूगु नियम लागु यायेवं नेपालं विद्यार्थी भिसाय् अस्ट्रेलिया वने चाहे जूपिंत नं थाकुइगु खँ थनया शैक्षिक परामर्श सेवा बियावयाच्वंपिंसं धाःगु दु ।

बिबिसी नेपाली अनलाइनपाखें अस्ट्रेलियाय् ब्वनाच्वंपि छुं नेपाःमि विद्यार्थीतलिसे खँ ल्हाःबलय् उमिसं थ्व योजनां अन्योल उत्पन्न जूगु खँ धाःगु दु ।

न्हूगु योजनाय् छु दु ?
अस्ट्रेलियाया संघीय सरकारया गृहमन्त्री क्लेर ओ’नीलं सार्वजनिक याःगु रणनीतिइ अस्ट्रेलियाया आप्रवासी नीतिइ यक्व हे सुधार यायेमाःगु खँ न्ह्यथनातःगु खः । देय्या गृहमन्त्रालयया वेबसाइटय् दुगु उगु रणनीतिया विवरण स्वयेबलय् सरकारं आप्रवासीतय् ल्याः यक्व दुगुलिं म्हो यायेत स्वःगु खनेदु । आः अस्ट्रेलियां अदक्ष वा अर्धदक्ष स्वयां दक्ष जनशक्ति जक थःगु देशय् हयेगु स्वयाच्वंगु खनेदु ।

भाषासम्बन्धी नियमय् नं हिउपाः
न्हूगु रणनीति अन्तर्गत अस्ट्रेलियां विद्यार्थी व अस्थायी भिसाया निंतिं आवश्यक अंग्रेजीया भाषिक शीपया मापदण्डयात नं थाकुका बिउगु दु । उगु रणनीतिइ आः विद्यार्थी व ‘टेम्पररी ग्राजुएट’ अर्थात ब्वने क्वचायेकाः दइगु अस्थायी भिसाया निंतिं आवेदन बीपिंसं इन्टरनेशनल इंग्लिस ल्यांग्वेज टेस्टिङ सिस्टम (आइएलटीएस)य् न्हापा स्वयां अप्वः ल्याः हयेमाःगु यानातःगु दु । थ्व नियम सन् २०२४ या सुरु निसें हे लागु जुइ ।

अस्थायी भिसा काइपिंसं न्हापां आइएलटिएसय् म्होतिं ६.० ल्याः हयेमाःगु खःसा आवंलि ६.५ ल्याः हयेमाःगु यानाबिउगु दु । अथेहे विद्यार्थीतय् निंतिं न्हापा म्होतिं ५.५ ल्याः यानातःगु खःसा आः उकियात अप्वयेकाः ६.० यानाबिउगु दु ।

अंग्रेजी भाय्या शीप बाहेक आप्रवासीतय्त लिच्वः लाकीगु कथंया मेमेगु विषय नं उगु रणनीतिइ् दुथ्याकातःगु दु ।

अस्थायी भिसासम्बन्धी नियम
अस्ट्रेलियाय् अध्ययनया निंतिं वंपिं विद्यार्थीतय् अनया स्थायी वासिन्दा जुइगु अवस्था मदुसां थौंकन्हय् छुं दँया निंतिं अस्थायी भिसा कयाः च्वनेमाः । थ्व थःम्हं अध्ययन याःगु तह कथं फरक जुइ । ‘टेम्पररी ग्राजुएट भिसा’ (टिजीभी) धाइगु थ्व प्रावधानय् नं हिउपाः हःगु दु । आःया रणनीतिइ ब्वने क्वचाःपिं विद्यार्थीत न्हापाया तुलनाय् म्हो ई जक अस्ट्रेलिया च्वनेदइगु यानाबिउगु दु । यक्व नेपाली विद्यार्थीत स्थायी बसोबासया अनुमति मवःतले टिभीजी कयाः अन हे च्वनेगु याना वयाच्वंगु खः ।

पुलांगु नियमकथं स्नातक क्वचाःपिं ब्वने क्वचायेधुंकाः निदँ, स्नात्तकोतर याःपिं स्वदँ व विद्यावारिधि याःपिं प्यदँ टिजीभी कयाः च्वनेदु । आः न्हूगु रणनीतिइ स्नातक याःपिं व रिसर्चसहित स्नातकोत्तर याःपिं छसिकथं निदँ व स्वदँ च्वनेदइगु नियमय् हिउपाः हःगु मदु । तर मास्टर्स बाइ कोर्सवर्क याःपिनि निंतिं अज्याःगु भिसाया ई निदँय् सीमित यानाबिउगु दु । विद्यावारिधि याःपिं च्वने दइगु ई नं स्वदँ जक यानाबिउगु दु ।

आःया नियम कथं अस्ट्रेलियाय् ‘रिजन’ धाइगु ग्रामीण भेगय् च्वनाः अध्ययन याइपिंसं न्हापांखुसी टिभीजीया ई क्वचायेधुंकाः हाकनं थप निदँ ब्वनेगु निंतिं भिसा काये दइ । तर आः थ्व अस्ट्रेलियाया भूगोल कथं जक लागू जुइगु खँ धाःगु दु । थ्व नियम यथावत तयातःगु दु, तर दक्ष जनशक्ति आवश्यक जूगु विषयय् न्ह्यागु थासय् च्वनाः ब्वंंसां न्हापांगु टिभीजीया ई क्वचायेवं थप निदँ ब्वनेदइगु प्रावधान धाःसा चिइकाबिउगु दु ।

पीआरसम्बन्धी व्यवस्था
आः अस्ट्रेलियाया स्थायी बसोबास (पीआर) कायेगु निंतिं अधिकतम उमेर ४५ दँ व टिभीजीया निंतिं ५० दँ तोके यानाबिउगु दु । थ्व कारणं यक्व हे ग्राजुएट याःपिं न्ह्याबलेंया निंतिं अस्थायी भिसाय् जक च्वनेमालीगु बाध्यता जुयाच्वंगु खँ उगु रणनीतिइ न्ह्यथनातःगु दु । आः थ्व नियमय् हिउपाः हयाः टिभीजीया निंतिं योग्य अधिकतम उमेर ३५ दँ जक यानाबिउगु दु ।

न्हूगु रणनीतिं न्हापा अस्पष्ट जुयाच्वंगु गुलिखे विषययात स्पष्ट नं यानाबिउगु दु । आः ब्वनेधुंकाः टिभीजी कायेमखंनिगु अवस्था तक ‘ब्रिजिङ भिसा’ कायेमाःगु अवस्था दु । थुकी नं ई क्वःछिनामतःगुलिं यक्व विद्यार्थी थज्याःगु भिसाय् ताःई तक च्वनेमाःगु बाध्यता जुयाच्वंगु खः । आः थुकियात अन्त्य यायेगु निंतिं धासें २१ न्हु दुने टिभीजी कायेदइगु वा काये मदइगु धयागु बारे निर्णय यायेगु खँ न्ह्यथनातःगु दु । अथेहे टिभीजीया नां हिलाः आः ‘पोस्ट हाइअर एजुकेशन वर्क’ व ‘पोस्ट भोकेशनल एजुकेशन वर्क’ याःगु दु ।
न्हूगु नीतिं नेपालीतय्त गज्याःगु लिच्वः लाकी ?

गैरआवासीय नेपाली संघ अस्ट्रेलियाया अध्यक्ष अनिल पोखरेलया कथं अस्ट्रेलियाया आप्रवाससम्बन्धी न्हूगु नियमं अन स्थायी बासेबास अनुमति कायेधुंकूगु नेपाःमितय्त खास हे लिच्वः लाइमखु । ‘तर विद्यार्थी भिसाय् च्वनाच्वंपिं, अस्थायी भिसा कयातःपिं व न्हूपिं अन वने चाहे जूपिंत धाःसा प्रत्यक्ष लिच्वः लाइगु खनेदु’ वय्कलं धयादीगु दु । ‘दकलय् अप्वः धासा अस्थायी भिसा कयातःपिं नेपाःमितय्त जुइगु खनेदुु’ वय्कःया बिचाः दु ।
सरकारं अस्थायी भिसाय् च्वनाः पीआर कायेमफयेवं हाकनं विद्यार्थी भिसा कयाः च्वनाच्वंपिंत कडा यायेगु कथंया नीति हःगुलिं उकिया व्यापक असर टिभीजीइ च्वनाच्वंपिं विद्यार्थीतय्त लाइगु खनेदु ।

पोखरेलं धाःगु दु, ‘थन विद्यार्थी भिसाय् वयाः अस्थायी भिसा कयाः ज्या याःपिं, हाकनं विद्यार्थी भिसाय् हे वःपिंत यक्व लिच्वः लाइगु खनेदु । भेटनरी कोर्सय् डिप्लोमा याःवःपिंत नं लिच्वः लाइगु खनेदु, छाय्धाःसां अज्याःगु कोर्स याःपिंत अप्वः टार्गेट याःगु थें खनेदु ।’ रणनीतिइ नं थ्व बारे न्ह्यथनातःगु दु । उकी अस्थायी भिसाय् छुं ई च्वनाः हाकनं विद्यार्थी भिसाय् लिहां वःपिनि ल्याः यक्व दुगु खँ न्ह्यथनातःगु दु ।

उकी धयातःगु दु, ‘हालया ग्राजुएट्स इन लिम्बोे’ प्रतिबेदनय् ग्राटन इन्स्टिच्यूटं अस्थायी स्नातक भिसा काःपिं मध्ये ३२ प्रतिशतं अस्ट्रेलिया बसाई ताःहाकयेगु निंतिं थःपिनिगु भिसाया म्याद क्वचायेवं हाकनं अध्ययनपाखे लिहां वंगु खँ पत्ता लगे याःगु दु ।’

छुं ई न्ह्यवनिसें स्नातक याःपिं आप्रवासीत मध्ये म्हो जक मनूतय्सं स्थायी वासिन्दाया अनुमति कायेखंगुलिं थथे हाकनं विद्यार्थी जूवंपिनि ल्याः अप्वःगु खँ रणनीतिइ न्ह्यथनातःगु दु । थथे हाकनं विद्यार्थी भिसाय् लिहां वंपिं मध्ये भेटनरी ब्वनेत वःपिं विद्यार्थीत यक्व दुगु खँ नं रणनीतिइ न्ह्यथनातःगु दु ।

अस्ट्रेलिया वने चाहे जूपिं नेपालीतय्त गज्याःगु लिच्वः लाकी ?
नेपाल शैक्षिक परामर्श संघया महासचिव दीपकराज भुसालया कथं अस्ट्रेलियाया न्हूगु आप्रवासन रणनीतिं अन च्वने चाहे जूपिं नेपाली विद्यार्थीतय्त नं छुं लिच्वः लाकीगु खनेदु । वय्कलं धयादीगु दु, ‘अस्ट्रेलियासहित विकसित देय्तय्सं थःगु जनशक्तियात व्यवस्थापन यायेगु निंतिं इलय् ब्यलय् रणनीतिइ हिउपाः हयाच्वनी । आः अस्ट्रेलियां याःगु नियम परिवर्तन नं विद्यार्थीतलिसे हे सम्बन्धित दु ।’

‘विद्यार्थीलिसे सम्बन्धित जूगु विषयं नेपाली विद्यार्थीतयत् नं छुं लिच्वः ला लाकी, तर धाथें हे ब्वंवने चाहे जूपिं व थःपिनि मापदण्ड पूवंपिनिगु निंतिं खास यक्व लिच्वः लाकीमखु जुइ’ वय्कलं धयादीगु दु ।

पोखरेलं अस्ट्रेलिया वने चाहे जूपिं नेपाली विद्यार्थीतय्सं आः हिउपाः हःगु न्हूगु नियमया मूल्यांकन यानाः जक प्रक्रिया न्ह्याकेत सुझाव बिउगु दु । वय्कलं धयादी, ‘अस्ट्रेलिया अवसरया थाय् खः । थन अध्ययन यायेबलय् व थःत दक्ष यात धाःसा अवसर यक्व दइ । तर सुरुइ हे ध्यबा कमे याये धकाः स्वयां नं न्ह्यागुसां विषयय् भर्ना जुयाः धाथें हे ब्वनेगु व अस्ट्रेलियाया आवश्यकता कथं दक्ष जुइ धकाः वल धाःसा भविष्यय् अःपुइ ।’

बिबिसी नेपाली अनलाइन