हारति अजिमायाथाय् ८ किलोया वहया मूर्ति

येँ(नेपालभाषा टाइम्स)-स्वयम्भू महाचैत्यस्थित हारति अजिमा द्यःयाथाय् च्यागू किलो वहया अजिमाया प्रतिमूर्ति दयेकाः छाःगु दु । येँया कन्या नकेगु निजी गुथिं च्यागू किलो बराबरया वहया अजिमाया प्रतिमूर्ति दयेकाः छाःगु खः ।

बौद्ध परम्पराय् अजिमा द्यःया तःधंगु महत्व दया वयाच्वंगु दु । उकिसनं स्वनिगःया रैथाने बौद्ध समुदायया नेवाःतय्सं जनजीवनय् स्वयम्भूस्थित हारति अजिमाया तःधंगु प्रभाव दया वयाच्वंगु दुसा उलि हे महत्व व आस्था नं दु ।

अजिमायात विशेष यानाः मस्त संरक्षण याइम्ह द्यःया रुपय् कायेगु यानातःगु दुसा हारति अजिमाया विशेष पुजा यायेगु नं चलन दु । स्वयम्भूस्थित हारति अजिमा द्यःया देगलय् अजिमाया कायकथं कयातःपिं धन भाजु, वासिं भाजु, जिलं भाजु, म्ह्याय्कथं कयातःपिं धन मय्जु व वासिं मय्जु नं दु ।

बौद्ध परम्परायात चिरस्थायी यानातयेगु ल्याखं थनया स्थानीय कन्या नकेगु गुथिं हारति मांयात ८ किलोया वहया प्रतिमूर्ति दयेकाः छाःगु खः । गुथिया दुजः रघुवरभक्त मानन्धरं थः पुर्खापिंसं हारति मांया देगः दुने वहया थीथीकथंया ज्वलनं छाय्पीगु याःगु धासें आः वहया प्रतिमूर्ति दयेकाः थापना यानागु जानकारी बियादीगु दु । हारति अजिमाया वहया उगु प्रतिमूर्ति प्राणप्रतिष्ठा नं याःगु दु । लिसें दँय्दसं माघ महिनया छन्हु उपयुक्त दिनय् मूल मूर्तिया न्ह्यःने आः प्रतिष्ठापन याःम्ह वहया मूर्ति सर्वसाधारणयात दर्शन याकीगु खँ धाःगु दु ।