जब न्याय बीम्ह न्यायाधीश हे नकली जुइ

येँ (नेपालभाषा टाइम्स)- सुनां गलत ज्या यात धाःसा वयात सजाय बीगु निकाय खः न्यायालय खः । तर न्यायालयय् न्याय बीम्ह न्यायाधीश हे गलत तरिका नियुक्त जू वन धाःसा सुनां छु यायेगु ?

उच्च अदालत तुल्सीपुर बुटवलया न्यायाधीश रेणुका शाह नं अथे हे गलत तरिकां नियुक्त जूगु पुुष्टि जूगु दु । उच्च अदालतया न्यायाधीश शाह गलत तरिकां नियुक्त जूगु खँ पुष्टि जुइवं न्यायपरिषदं वयात बर्खास्त यायेगु निर्णय नं याःगु दु ।

न्यायाधीश शाहं नियुक्ति काःगु इलय् पेश यानातःगु भ्वं गलत जूगु खँ आः वयाः प्रमाणित जूगु खः । शाहं थःगु न्युनतम योग्यता हे गलत क्यनाः नियुक्ती काःगु खँ आः वयाः सीदः वःगु खः ।

म्हिगः च्वंगु न्यायपरिषद्या बैठकं वय्कलं पेश यानातःगु भ्वं गलत खः धइगु प्रमाणित जुइवं बर्खात यायेगु निर्णय यासें प्रधानन्यायाधीश समक्ष पेश यायेत्यंगु खँ न्यायपरिषद्या प्रवक्ता मानबहादुर कार्कीं कनादीगु दु ।

न्यायाधीश जुइगु लागिं निरन्तर १० दँ तक वकालत यायेमाःगु व न्याय तथा कानुनया क्षेत्रय् च्वनाः ज्या यायेमाःगु प्रावधान दु । तर शाहं अज्याःगु फुक्क हे भ्वं नकली पेश याःगु जुयाच्वन । शाह वास्तवय् सिटीइभिटीया प्रशासन शाखाय् ज्या याइम्ह कर्मचारी जुयाच्वन । वयागु नकली भ्वं बारे थीथी सञ्चार माध्यमय् समाचार पिहां वयेवं न्यायपरिषदं वयाके स्पष्टीकरण नं काःगु खः । तर अन नं वं थःगु सकली भ्वं पेश याये मफयेवं वयात बर्खास्त यायेगु निर्णय न्यायपरिषदं याःगु खँ धाःगु दु ।

थ्व काण्डं नेपाःया न्याय ख्यलय् जुयाच्वंगु मेगु छगू विकृति उजागर जूगु खँ धयाःगु दु ।