नेवाः कलाकारतय्सं शंखधरया ध्वाँय् छेँय्छेँय् ब्वयेकीगु

यल (नेपालभाषा टाइम्स) – नेपाल संवत् ११४१ न्हूदँ नेवाः कलाकारतसें छगू बिस्कं कथंया ज्याझ्वः यानाः न्यायेकीगु जूगु दु । न्हूदँ ११४१ या लसताय् सकलें नेवाः कलाकारतय्सं नेपाल संवत्या प्रवर्तक नापं राष्ट्रिय विभूति शंखधर साख्वाया किपा दुगु ध्वाँय् सकल नेवाः कलाकारपिंसं थःथःगु छेँय् ब्वयाः न्हूदँया लसता हनीगु जूगु दु । थुकथं हे सकलें नेवाः कलाकारत मुनाः ऐतिहासिक रुपं छगू नेवाः भ्वय् न्यायेकाः न्हूदँ हनेत्यंगु दु ।

विश्वय् महामारीया रुपय् न्यना वनाच्वंगु कोभिड-१९ या उच्च संक्रमण व जोखिमयात ध्यानय् तयाः स्वास्थ्य सुरक्षा मापदण्डयात हाचां मगासे व्यवस्थित रुपं न्हूदँ हनेगु निंतिं नेवाः कलाकारतय् दथुइ छगू सहलह मुँज्या जूगु खः । सहलह मुँज्याय् क्वःछिउगु निर्णय कथं वइगु ने.सं. ११४० कौलागा द्वादशि (कात्तिक २७) गते विहीवाः वाब्मय शताब्दीपुरुष डा. सत्यमोहन जोशीया छेँय् शंखधरया ध्वाँये ब्वयेकाः ज्याझ्वः शुरु याइगु जूगु दु। अथे हे ने.सं. ११४० कौलागा त्रयोदशि, क्वःपुजा (कात्तिक २८) गते शुक्रवाःकुन्हु सकल कलाकार मुनाः न्हूदँया भिंतुना कालबिल यायेकथं यलया शंखम्वलय् च्वंगु दरवार ब्यांक्वेटय् नेवाः भ्वय् यायेगु क्वःछिउगु दु ।