जाह्वलाख्यलय् ऐतिहासिक जरुं पुनःस्थापना
यल (नेपालभाषा टाइम्स)÷थनया जाह्वलाख्यःस्थित श्री उग्रचण्डी माई देगः लिक्कं ऐतिहासिक जरुं पुनःस्थापना याःगु दु । उग्रचण्डी देगः लिक्कसं च्वंगु उग्रचण्डी मोसिंख्यलय् अवस्थित ४०० दँ पुलांगु अनुमान यानातःगु ऐतिहासिक जरुं पुनःस्थापना याःगु खः ।
छुं दँ न्ह्यः उगु लागाय् याःगु सतक विस्तारया कारणं ताःई न्ह्यःनिसें ल्हानाच्वंगु उगु जरुंहिति ताम्रकार समाजं यल महानगरपालिका ४ वडा ज्याकूया ग्वाहालिं पुनःस्थापना याःगु खः ।
यल महानगरपालिकाया प्रमुख चिरिबाबु महर्जनं उगु ऐतिहासिक जरुंया उलेज्या यानादीगु खः । जरुं उलेज्यालिपा वय्कलं थुकथंया ऐतिहासिक सम्पदा पुनःनिर्माणलिसें उकिया संरक्षण व संवद्र्धनया निंतिं विशेष ध्यान बीमाःगु खँ धयादिल । लिसें वय्कलं जरुं पुनःस्थापना लिपा न्ह्याबलें न्ह्याबलें त्वनेगु लः हायेका तये फइगु खँ ध्यान बीमाः धयादिल ।
थनया ताम्रकार समुदायया देगुद्यः श्री उग्रचण्डी माई लिक्कं च्वंगु मोसिंख्यलय् समुदायया पूर्खापिंसं तुंलिसें उगु जरुं निर्माण यानातःगु समाजया नायः विनोद ताम्रकारं कनादीगु दु । नायः ताम्रकारयाकथं साधारण तयाः जरुंहितिइ छपू जक हिति दइगु खःसां थुगु ऐतिहासिक जरुंहितिइ स्वपु हिति तयातःगु दु । थ्व ल्याखं नं थ्व जरुं अतिकं महत्वपूर्ण जूगु वय्कःया धापू दु ।
उगु इलय् यल महानगर प्रमुख महर्जन उपप्रमुख मञ्जरी शाक्य वज्राचार्यंलिसें मेमेपिंसं नं जरुंया लः त्वनादीगु खः । लिसें उगु इलय् जाह्वलाख्यलय् पुनःस्थापना याःगु टाइगेर गेट, वडाया वेबसाइट, मोबाइल एप नं सार्वजनिक याःगु खः ।
LEAVE YOUR COMMENTS