मेडिकल कलेजतय्सं शुल्क लित मबीगु अडान काल

येँ – निजी मेडिकल कलेजतय्सं अन्तिम इलय् वयाः आः हानं एमबीबीएस ब्वनाच्वंपिं विद्यार्थीतय्के अप्वः कयातःगु ध्यबा लित बी मफइगु अडान काःगु दु । म्हिगः शिक्षा, विज्ञान तथा प्रविधिमन्त्री गिरीराजमणि पोखरेललिसे जूगु वार्ताया इलय् निजी कलेजतय्सं ध्यबा लित मबीगु अडान न्ह्यःने तःगु खः ।

मेडिकल कलेज सञ्चालकतय्सं शैक्षिक सत्र २०७४÷७५ व २०७५÷७६ या लागिं काःगु अतिरिक्त शुल्क लित बी फइ मखु धासें शिक्षामन्त्रीयात पौ बिउगु खः । थःपिंसं विद्यार्थी भर्ना यायेधुंकाः सरकारं न्हूगु शुल्क क्वःछिउगु व वंगु आर्थिक दँय् विद्यार्थीतय्सं पूगु शुल्कपाखें हे सरकारायात पुलेमाःगु राजश्व, विश्वविद्यालय व मेडिकल काउन्सिलयात पुलेमाःगु शुल्क पुलागुलिं आः विद्यार्थीतय् शुल्क लित बी मफइगु खँ कलेज सञ्चालकतय्सं धाःगु खः ।

सरकारं मेडिकल कलेजतय्सं विद्यार्थीतय्के काःगु अतिरिक्त शुल्क लित बीत बिउगु अल्टिमेटम क्वचाःगु छन्हु लिपा कलेज सञ्चालकतय्सं शुल्क लित बी मफइगु अडान काःगु खः । सरकारं न्हापा काःगु अतिरिक्त शुल्क लित बीमाःगु व लित मबिल धाःसा कलेजया सञ्चालकतय्त ठगी मुद्दा तयाः कारबाही यायेगु ख्याच्वः बिउगु खः ।

मेखे मेडिकल कलेजं विद्यार्थीया शुल्क लित मबीगु अडान कायेवं म्हिगः हे उकियात कयाः सहलह शुरु जूगु दु । शिक्षा, विज्ञान तथा प्रविधि मन्त्रालयय् म्हिगः बहनी गृहमन्त्री रामबहादुर थापा, शिक्षा मन्त्री गिरिराजमणि पोखरेल, महान्यायाधिवक्ता अग्नि खरेल दथुइ बैठक च्वंगु खः ।

तर मेडिकल कलेजया सञ्चालकपिनिगु अडानयात छु यायेगु धइगु बारे छुं ठोस निर्णय धाःसा जुइफुगु मदुनि ।अप्वः शुल्क लित बीमाः मेडिकल विद्यार्थीतय्सं नं ताःई न्ह्यवंनिसें आन्दोलन याना वयाच्वंगु दु ।

सम्बन्धित बुखँ

LEAVE YOUR COMMENTS