ने. सं. ११४४ कौलाथ्व चौथी -

राजधानी अस्तव्यस्त – दल व नेतातय्त दुर्गा प्रसाईंया गालीगलौज

येँ (नेपालभाषा टाइम्स)- जुजुवादी मेडिकल व्यवसायी दुर्गा प्रसाईं समर्थक कार्यकर्तातय्सं म्हिगः थनया बल्खुइ प्रदर्शन यातसा उकिया प्रतिरोधय् एमाले समर्थित नेता महेश बस्नेतया नेतृत्वय् युवा संघया कार्यकर्तातय्सं तीनकुनय् प्रदर्शन यात ।

बल्खुइ जूगु प्रसाईंया प्रदर्शनय् प्रहरीं लःया फोहरां छ्वाकेमाःगु अवस्था पिहां वलसा अन छुं ई निगू पक्षया दथुइ ल्वापु नं जुल । बल्खुया प्रदर्शनय् प्रसाईं छुं ई न्ववायेगु नं ज्या यानादिल । अन न्ववासें आः थः कार्यकर्तातय्सं सिंह दरवार व वालुवाटार कब्जा यायेगु जुइ धकाः घोषणा यानादिल । लिसें वय्कलं गणतन्त्रवादी नेतातय्त लाक्वपाक्व ब्वः बियाः आः उमित जनतां गःतां ज्वनाः क्वत हइ धकाः नं धयादिल ।

प्रसाईंया भाषणं उत्तेजित जूपिं कार्यकर्तातय्सं जुलुसयात कालिमाटीपाखे यंकेगु कुतः यायेवं प्रहरीं लाठीचार्ज यानाः पनेमाःगु अवस्था पिहां वःगु खः । प्रसाईंया कार्यकर्तातय्सं ‘हाम्रो राजा हाम्रो देश प्राणभन्दा प्यारो छ’ धइगु पञ्चायतकालीन नारा थ्वयेकाः वःगु खः । लिसें उमिसं ‘नारायणहिति खारेज गर, हाम्रो राजा आउँदैछ’ धकाः नं नारा थ्वयेकूगु खः ।

मेखे तीनकुनेय् प्रदर्शन यानाच्वंपिं महेश बस्नेतया कार्यकर्तात धाःसा शान्त खनेदु । उमिसं राजावादीतय्त ब्वः बियाः नाराबाजी याःगु खः । प्रसाईं स्वयां नं युवा संघं म्हिगः यक्व कार्यकर्ता क्वकाःगु खनेदु ।

निगू पक्षं निथाय् प्रदर्शन याःगु कारणं म्हिगः स्वनिगःया यातायात धाःसा प्रभावित जुल । अथे नं म्हिगः फुक्क धइथें निजी विद्यालय बन्द याःगु जुयाः सतकय् उलि अप्वः यातायात नं चले जूगु खने मदु ।