‘ज्ञानेन्द्र शाहं श्रीपेच ज्वना वनेगु इच्छा याःगु खः’

येँ – शाहवंशया अन्तिम जुजु ज्ञानेन्द्र शाहं राजगद्दी त्वःते त्ययेकाः जुजुं पुइगु श्रीपेच थम्हं हे ज्वनावनेगु इच्छा यानादीगु खँ सीदुगु दु । वय्कलं अबले थःलिसे वार्ता याः वःम्ह तत्कालीन गृहमन्त्री कृष्णप्रसाद सिटौलालिसे जूगु याकः–याकः वार्ताय् थ्व इच्छा प्रकट यानादीगु खः । भाजु सिटौलां म्हीग बहनी बीबीसी नेपाली सेवालिसे यानादीगु खँल्हाबल्हाय् थुकिया खुलासा यानादीगु खः ।

भाजु ज्ञानेन्द्रं राजगद्दी त्वःतूसां श्रीपेच धाःसा थम्हं हे ज्वना वने धकाः इच्छा व्यक्त यानादीगु खःसा सिटौलां थ्व श्रीपेच धइगु देशया हे सम्पत्ति जूगु कारणं थुकिया सुरक्षा राष्ट्रं हे याइ धकाः वय्कःयात आश्वस्त यानादीगु खः ।

यदि ज्ञानेन्द्रं शाहं श्रीपेच ज्वना वन धाःसा कन्हय् थ्व अलपत्र जुइफु धासें वय्कःया सन्तानतय्सं थुकिया संरक्षण याये नं मयाये नं फु बरु सरकारयात बिया थकल धाःसा सरकारं थुकिया पूर्ण सुरक्षा याना तइ धकाः नं कनादीगु खः । थ्व श्रीपेच धइगु पृथ्वीनारायण शाहया सम्पत्ति खः, नेपाः एकीकरणय् पृथ्वीनारायण शाहया तःधंगु योगदान दुगु जुयाः थ्व श्रीपेचयात नेपाः एकीकरणया प्रतीककथं नं ल्यका तयेमाःगु खँ सिटौलां कनादीगु खः ।

भाजु ज्ञानेन्द्र शाहं राणा शासन अन्त जूबलय् उमिसं नं थःपिनिगु श्रीपेच ज्वनावंगु तर्क तयादीगु खःसा उकिया लिसलय् सिटौलां ‘अय् जुयाः हे उमिगु श्रीपेच थौं गन दु धइगु नं अतापता मंत नि’ धकाः लिसः बियादीगु खः ।

संविधानसभां राजतन्त्र अन्त्य यायेगु निर्णय यायेधुंकाः राजदरवार खाली यायेगु बारे जुजु ज्ञानेन्द्रलिसे खँल्हायेत गृह सचिवया नेतृत्वय् अबले छगू कार्यदल गठन यानातःगु खः । तर ज्ञानेन्द्र शाहं उगु कार्यदलयात वास्ता मयाःगुलिं गृहमन्त्री सिटौलां आः छु याये माली धकाः तत्कालीन प्रधानमन्त्री गिरिजाप्रसाद कोइरालालिसे खँल्हानादिल । थ्व धुंकाः कोइरालाया हे प्रतिनिधि जुयाः सिटौलां ज्ञानेन्द्र शाहलिसे वार्ता यानादीगु खः ।
सिटौला अबले गृहसचिव सहितया पुचः ज्वनाः दरवार वंगु खःसा ज्ञानेन्द्र शाहं याकः–याकः वार्ता यायेगु इच्छा प्वंकादीगुलिं सचिव सहितया कर्मचारीतय्त पित छ्वयाः शाह व सिटौला निम्ह जक च्वनाः वार्ता याःगु खः ।

उगु हे वार्तालापय् शाहं श्रीपेच थम्हं ज्वनावनेगु इच्छा प्रकट यानादीगु खः । लिसें थः च्वनेगु व्यवस्थाया नं माग यानादीगु खः । उगु इलय्
वय्कःयात नागार्जुनय् च्वनेगु व्यवस्था याना बीगु बचं नं सिटौलां बियादीगु खः । तर थः नागार्जुनय् च्वं वंसां थः मां रत्न राज्यलक्ष्मी शाहं धाःसा नारायणहितिइ हे च्वनेगु इच्छा व्यक्त याःगु खँ कनादीगु खः ।

मां नारायणहितिइ च्वनीगु जूगुलिं गबलें गबलें थः मां नापलाः वयेबलय् अवरोध जकं जुइगु मखुला धकाः नं वय्कलं जिज्ञासा प्वंकादीगु खः । उकी सिटौलां मां नापलाः वइम्ह काययात पनेगु ला खँ हे जुइ मखु नि धकाः अवरोध मजुइगु खँ कनादीगु खः ।

पुलांम्ह जुजु शाहयात नागार्जुनय् च्वनेगु व्यवस्था सरकारं याना बी धकाः अबले धाःगु जुयाः आः वय्कःयात अनं चीकेमाःगु आवश्यकता मदुगु बिचाः नं सिटौलां प्वंकादीगु दु । शाह थौंकन्हय् गणतन्त्र विरोधी ज्याखँय् लगे जूगु द्वपं बिसें वय्कःयात नागार्जुनं चीका छ्वये मालीगु ख्याच्वः सत्तारुढ दल नेकपाया अध्यक्ष पुष्पकमल दाहालं बियाहःगु सन्दर्भय् सिटौलां थ्व बिचाःतयादीगु खः ।

ज्ञानेन्द्र शाहलिसे जूगु खँल्हाबल्हाया झ्वलय् सिटौलां संसारया थीथी देशय् हिंसात्मक आन्दोलन लिपा राजतन्त्र अन्त्य जूगु इतिहास दुसां नेपालय् धाःसा संविधानसभां निर्णय यानाः राजतन्त्र अन्त्य जुइत्यंगु दु, थ्व छगू तःधंगु हे ऐतिहासिक खँ खः, थुकी छिगु योगदान सदां लुमनाच्वनी धकाः नं ह्ययेकादीगु खः ।

सम्बन्धित बुखँ

LEAVE YOUR COMMENTS