न्हूदँ समारोह समितिपाखें शंखधर प्रतिष्ठान अवलोकन

थिमि(नेपालभाषा टाइम्स)/ नेपाल संवत् न्हूदँ राष्ट्रिय समारोह समिति–११४५ पाखें राष्ट्रिय विभूति शंखधर प्रतिष्ठानया अवलोकन याःगु दु । न्हूदँ समारोह समितिया नायः राजेन्द्रप्रसाद श्रेष्ठया नेतृत्वया पुचलं मध्यपुर थिमि च्वंगु प्रतिष्ठानया अवलोकन याःगु खः ।
उगु इलय् राष्ट्रिय विभूति शंखधर साख्वाः प्रतिष्ठानया नायः ज्ञानराम श्रेष्ठं प्रतिष्ठान अवलोकनया निंतिं वःगु न्हूदँ समारोह समितिया प्रतिनिधिमण्डलयात लसकुस यानादीगु खः । लिसें नायः श्रेष्ठं उगु इलय् प्रतिष्ठानं भवन अवलोकन याकेगुया नापं प्रतिष्ठानं याना वयाच्वंगु थीथी गतिविधि व ज्याझ्वः बारे नं जानकारी बियादीगु खः ।
उगु इलय् समारोह समितिया प्रतिनिधिण्डलं प्रतिष्ठानया भवनय् च्वंगु शंखधर संग्रहालयया अवलोकन यायेगुया नापं प्रतिष्ठानं नेपाल संवतया प्रवर्तक राष्ट्रिय विभूति शंखधर साख्वाःया बारे संकलन यानातःगु थीथी सामग्री, शंखधर साख्वाःलिसे स्वापू दुगु महत्वपूर्ण व ऐतिहासिक महत्वया दस्तावेज, ज्वलंया बारे जानकारी कयादीगु खः ।
प्रतिष्ठानया अवलोकन लिपा समितिया नायः श्रेष्ठं प्रतिष्ठानं याना वयाच्वंगु ज्यायात कयाः च्वछायादिसें प्रतिष्ठानयात सरकारीस्तरय् यंकेमाःगु विचाः तयादीगु खः । लिसें वइगु दिनय् समारोह समितिं प्रतिष्ठानलिसें सहकार्य यानाः न्ह्याः वनेमाःगु विचाः नं तयादीगु खः ।