बुद्ध बूगु थाय्‌या बारे विवाद यानाच्वने अावश्यक मदु – प्रधानमन्त्री

प्रधानमन्त्री केपी ओलीं बुद्ध बूगु थाय् बारे विवाद व बहस यानाच्वनेमाःगु आवश्यक मदु धयादीगु दु । २५६२ क्वःगु स्वांयाः पुन्हिया लसताय् सोमवाः लुम्बिनीइ जूगु ज्याझ्वलय् न्ववानादिसें वय्कलं थ्व खँ धयादीगु दु । लुम्बिनी विकास कोषया ग्वसालय् जूगु ज्याझ्वलय् न्ववानादिसें वय्कलं धयादीगु दु, ‘बुद्ध गन बूगु धयागु बारे मनूतय्सं छाय् भ्रम न्यंकाच्वंगु ? जबकि भारतया सम्राट अशोकं हे अशोक स्तम्भ दयेकाः बुद्ध नेपालय् बूगु धकाः धया वनेधुंकूगु दु ।’

बुद्धया उपदेश आः नं उतिकं हे सान्दर्भिक दनि धयादिसें वय्कलं बुद्ध दर्शन नेपाःपाखें हे सुरु जूगु खः धयादिल । बुद्ध दर्शन व बुद्ध जन्म बारे बहस व विवादया विषय् दयेके मजिउ धयादिसें वय्कलं धयादीगु दु, ‘मूर्खतय्सं बिचाःलिसे प्रतिवाद याइमखु, तप्यंक शालिकय् जक आक्रमण याइ ।’

थ्व झ्वलय् वय्कलं लुम्बिनी थ्यनकि मनूतय्त शान्तिया अनुभूति जुइकथं विकास यायेमाःगु खँय् बः बियादिल । बुद्धया सन्देशया नस्वाः ज्ञानय् जक मखु, फसय् नं दयेमाः धयादिसें वय्कलं लुम्बिनीइ सिसाबुसाया सिमा, स्वां पिइत इनाप यानादिल । अथेहे वय्कलं रामग्राम निसें तिलौराकोट तकया क्षेत्रयात विशेष महत्व बियाः विकास यायेगु प्रतिबद्धता नं प्वंकादीगु दु ।

सम्बन्धित बुखँ

LEAVE YOUR COMMENTS