ने. सं. ११४४ कौलाथ्व दशमी - स्याक्वत्याक्व

सिथि नखः बारे कार्यशाला गोष्ठी

येँ (नेपालभाषा टाइम्स)- वल्र्ड नेवाः अर्गनाइजेसनया ग्वसालय् इतुंबहाः म्युजियम परिसरय् ल्याय्म्हतय्त लक्षितयानाः सिथि नखःया बारे कार्यशाला गोष्ठी जुल ।ज्याझ्वलय् लेखक , अनुसन्धानकर्ता नापं शहरी योजनाकार भाजु पद्मसुन्दर जोशीं थःगु ज्यापौ न्ह्यब्वयादीग खः। ज्यापौ न्ह्यब्वयेगु झ्वलय् वय्कलं नेपाःगाःया नेवाःतय् नखःचखः व तजिलजि प्रकृति व कृषिनाप स्वात्तुस्वानाच्वंगु खँ न्ह्यथँसे सिथि नखः नं लः नाप सम्बधित नखः जूगु खँ कनादिल । सिथि नखःयात कुमार षष्ठिनं धाइ , कुमारया अर्थ ल्याय्म्ह खः उकिं वयात ल्याय्म्ह नखः कथं नं कायेछिं धयादिसें कुमार लःया मचानं खः धयादिल ।

सिथि नखः स्वयांन्ह्यः थी थी नेवाःसमुदायपिनि थीथी इलय् देगु पुजा जुइ । दकले लिपा देगुपुजा याइपिनि सिथि नखःकुन्हु याइ धाःसें देगुया अर्थ देय्या गुँ (जंगल) जुगु खँ न्ह्यथंसे लःया मुहान जंगल जूगु कारणं दँय् छक जूसां उकिया संरक्षण यायेगु हेतुं देगुपुजा यानावयाच्वंगु व खुल्ला थाय्या अवधारणा कथं अन छुंनं कथंया देगः मदंसे खालि ल्वहं जक तयाः देगुद्यः पुजा यानावयाच्वंगु खँ उलादिल। थौंकन्हय् गुलिं नेवाः समुदायया देगुद्यः वस्तिविकासक्रम तच्वः जुयाः बस्ति दुने लाःवंगु खँ न्ह्यथनादिल ।

वा वयेगु शुरु जुइ न्ह्यः व सुख्खायामया अन्तिम इलय् तुं, हिति, बुगा आदि सफायानाः नखःकथं नेवाःतय्सं सार्वजनिक जीवन सुथांलाक्क हनेत सिथि नखः हनावयाच्वंगु खँ न्ह्यथँसे नेवाःतय् थःगुछेँय् निजी बैठक,क्वथा धैगु तकं मदु, बरु चुक,ननी, बहाः, फल्चा आदिइ सामूहिक अन्तरक्रिया यानाः सामुहिक व सार्वजनिक जीवन हनावयाच्वंगु खँ कनादिल।

थौंकन्हय्या ल्याय्म्ह पुस्तायात नं झीगु च्वछाय्बहःगु सिथि नखःदुने सुलाच्वंगु खँ थुइकेगु व थुइका बीमाःगु आवश्यकता दुगु खँय् वय्कलं बः बियादिल। ज्याझ्वलय् सहभागी जुयादीपिं ल्याय्म्ह भाजु–मय्जुपिंसं न्यंगु थीथी न्ह्यसःया लिसः नं वय्कलं बियादीगु खः
ज्याझ्वलय् वल्र्ड नेवाः अर्गनाइजेसनया छ्याञ्जे नापं उगु ज्याझ्वया कजि मयजु लुमु श्रेष्ठं लसकुस न्वचु तसें ज्याझ्वःया तातुनाः बारे कनादिल ।