‘कोशी’ मदुगु वक्तव्यं विवाद

येँ (नेपालभाषा टाइम्स)- प्रदेश नम्बर १ (कोशी) या मुख्यमन्त्री केदार कार्कीं म्हिगः तमु ल्होसारया भिन्तुना बिसें जारी यानादीगु वक्तव्य विवादय् लाःगु दुसा लिपा वय्कलं विवादय् लाःगु वक्तव्य लित कयाः हानं मेगु वक्तव्य जारी यानादीगु दु ।

वय्कलं म्हिगः थःगु लेटरहेडय् मुख्यमन्त्रीया नां दुसां प्रदेशया नां हे उल्लेख मयासे वक्तव्य जारी यानादीगु खः । प्रदेश संसदं प्रदेशया नां ‘कोशी’ धकाः तयेधुंकूगु दुसां मुख्यमन्त्री कार्कीया वक्तव्यय् धाःसा कोशी नां उल्लेख मखुगु खः । वय्कःया उगु वक्तव्ययात पहिचान पक्षधरतय्सं लसकुस याःगु खःसां छुं राजनीतिक दलतय्सं धाःसा विरोध याःगु खः ।

आदिवासी जनजातितय्सं ‘कोशी’ नां मतसे पिहां वःगु वक्तव्ययात लसकुस याःगु खःसा विशेष यानाः एमालेया कार्यकर्तातय्सं उकिया आलोचना याःगु खः । मुख्यमन्त्री कार्कीं म्हिगः जारी याःगु भिन्तुना वक्तव्यया खवय्पाखे ‘मुख्यमन्त्री’ व जवय्पाखे ‘विराटनगर नेपाल’ च्वयातःगु खः । उकी गनं नं कोशी प्रदेश धकाः नां न्ह्यथनातःगु मदु ।
एमालेया नेतातय्सं मुख्यमन्त्रीया वक्तव्यया आलोचना यायेवं उकिया घौछि लिपा हे वक्तव्ययात भिंकाः मेगु वक्तव्य जारी याःगु खः । लिपा पिथंगु वक्तव्यय् धाःसा जवय्पाखे ‘कोशी प्रदेश, विराटनगर’ च्वयातःगु खः ।

मुख्यमन्त्रीया प्रेस सल्लाहकार देवनारायण साहं नं प्राविधिक कमजोरीया कारणं ‘कोशी प्रदेश’ च्वयेगु त्वःफिउगु खँ धयादीगु दु । वय्कलं गल्ली खनेवं उकियात भिंकाः हाकनं मेगु भिन्तुना वक्तव्य जारी यानागु खँ नं धयादीगु दु ।

थ्वयां न्ह्यः पहिचानवादी नेता अर्जुन जम्नेली राईं मुख्यमन्त्री कार्कीया प्रशंसा यासें सामाजिक सञ्जालय् बिचाः तयाहःगु खः । वय्कलं ‘थज्याःगु कोशी शब्द मदुगु भिन्तुना जक स्वीकार्य जुइ, सुभाय् मुख्यमन्त्री कार्यालययात, सुनां कोशी नां जक स्थापित यायेत चाहे जूसा उपिं विखण्डनकारी, नश्लवादी खः’ धकाः अभिव्यक्ति बियादीगु खः ।

लुमंकेबहः जू, प्रदेश १ या संसदं थःगु नां ‘कोशी’ धकाः तयेवं उकिया विरुद्ध अनया पहिचानवादीतय्सं लगातार आन्दोलन याना वयाच्वंगु दुसा उकी लानाः छम्ह मनू सीधुंकूगु दु । पहिचानवादीतय्सं एमाले अध्यक्ष केपी शर्मा ओली लगायत थीथी नेतातय्त ‘ब्ल्याक लिस्ट’ य् तयातःगु दुसा वर्तमान मुख्यमन्त्री कार्कीया गाडीइ समेत आक्रमण यायेधुंकूगु दु ।

थ्व प्रदेश वंगु छुं ई न्ह्यवंनिसें अस्थिर जुयाः वंगु दछिया दुने न्याक्वः सरकार परिवर्तन जुइधुंकूगु दु ।