आकाशे ताँ तत्काल मर्मत यायेत इनाप

येँ(नेपालभाषा टाइम्स)-येँ महानगरपालिकां महानगर क्षेत्र दुनेया आकाशे ताँ (आकाशे पुल) तत्काल मर्मत सम्भार यायेमाःगु आवश्यकता जूगु खँ धाःगु दु । महानगरं निजी साझेदारी ज्याझ्वः अन्तर्गत निर्माण जूगु अज्याःगु आकाशे ताँ तत्काल मर्मत यायेमाःगु खँ धाःगु दु ।

येँ महानगर उपप्रमुख सुनिता डंगोलं सार्वजनिक निजी साझेदारी इकाईया अधिकारीतलिसे जूगु खँल्हाबल्हाया इलय् आकाशे ताँत तत्काल र्मन यायेत इनाप यानादीगु खः । थौंया इलय् तक थ्यंगु अवस्थाय् आकाशे ताँत तसकं असुरक्षित जूगु धासें तत्काल सुधारया ज्या न्ह्याकेमाःगु उपप्रमुख डंगोलं धयादीगु खः ।

‘महानगर दुनेया अप्वःथें आकाशे ताँया अवस्था तसकं दयनीय खनेदु । संरचना दक्वं स्यनाच्वंगु दु’, महानगर उपप्रमुख डंगोलं धयादीगु दु, ‘आकाशे तां वनेबलय् तक्यनाः दइगु अवस्था दु । बार नं ततःजाः जूगुलिं सुथय् बहनि वनेबलय् ताँ जुयाः वनेत असुरक्षित महसुस जुयाच्वंगु दु ।

सुधारया निंतिं तत्काल ज्या न्ह्याकेमाःगु आवश्यक खने दु धासें वय्कलं अपांगता जूपिं ताँ गयाः वने फइगु स्थिति मदु, जोखिम नाला सतकं हे लँ त्वाःल्हायेमाःगु अवस्था दु । ताँय् च्वंगु बारया जाः नं म्हो यायेत इनाप यानादिल । ताँ मर्मत यायेबलय् बार चिजाः यानाः पारदर्शी यायेमाःगु खँय् बः बियादिसें ‘दयकधेधुंकाः सिधल धकाः अथें त्वःते मजिउ । उकियात मर्मत यायेमाः’ वय्कलं धयादिल ।

उगु इलय् महानगरया निर्देशक नूरनिधि न्यौपानें सार्वजनिक निजी साझेदारी ज्याझ्वः अन्तर्गत संचालनय् दुगु टावर, सार्वजनिक चःबि लगायतया संरचना निर्माण व व्यवस्थापनया बारे जानकारी याकादीगु खः ।