आवश्यकता व प्राथमिकताया लिधंसाय् योजना दयेकाः ज्या याये

छिगु एजेन्डा छु छु खः ?
वडाया गुगुं नं त्वाःयात पक्षपात मयासे समानुपातिक विकास यायेगु । लः व धःया समुचित व्यवस्थापन व निकास बीगु नापं चुक, ननि, गल्ली, सतकयात न्ह्याबलें नं सुचुकुच याना तयेगु । आर्थिक चलखेलयात निरुत्साहित यानाः । वडावासीयात सहज सेवा बीगु । निष्पक्ष धंगं न्याय व कार्य सम्पादन यायेगु । पिनेयापिनिगु कारणं ब्वलनाच्वंगु समस्या, विकृति, विसंगतियात निर्मूल यायेत फक्व कुतः याना वनेगु ।

वडाया मुख्य समस्यात छु खः थें च्वं ?
मुख्य ला त्वनेगु लः व धःया उचित निकास हे खः । नापं शान्ति सुरक्षा कायम यानाः अमन चैनया नं समस्या दु । थाय् थासय् फोहरया समस्या नं उतिकं दुसा व्यवस्थापन यायेगु उचित थाय्या अभाव दु । अथे हे थुगु वडाया थीथी थासय् अव्यवस्थित रुपं तया वयाच्वंगु बँपसःया कारणं खने दुगु समस्या व्यवस्थापन यायेमाःगु दु ।

निर्वाचित जुयादी धइगु आधार छु ?
थ्व वडाय् नेकपा (एमाले)या आधार तसकं बल्लाः । वडाया विकासया ज्याय् थ्व पार्टी न्ह्यःने लाः । देशभक्तिया भावनां जाःगु व विकासपे्रमी पार्टी जूगुलिं जिमित वडावासीं मत बी धइगु विश्वास दु । थ्व वडाय् निक्वःतक एमालें त्याकाः जनताया मन त्याकाः वडावासीया सेवा यायेधुंकूगु दु । जनप्रतिनिधितय्सं नं गबलें पक्षपातपूर्ण व्यवहार याःगु मदु । विकास निर्माणलिसें मेमेगु क्षेत्रय् नं आपालं ज्या यानाः वडावासीया मन त्याकेत ताःलाःगुलिं जिमित अत्याधिक भोट बियाः त्याकी धइगु विश्वास दु ।

निर्वाचित जुया वल धाःसा न्हापां छु यानादी ?
वडा ज्याकूयात व्यवस्थित यानाः संचालन याये । सेवाग्राहीयात सुलभ सेवा प्रवाह यानाः वडावासीया मन त्याके । त्वाःया बुद्धिजीविनाप सहलह यानाः आवश्यकता व प्राथमिकताया लिधंसाय् योजना कार्यान्वयन याये । वडाया समस्यायात फक्व अप्वः समाधानया निंतिं कुतः याये ।

भाषा, कला, संस्कृतिया उत्थानया निंतिं छु योजना दु ?
थ्व आपालं नेवाःत च्वनाच्वंगु वडा खः । स्थानीय भाषा धइगु नेपालभाषा खःसा कला, संस्कृति नेवाःतय्गु जक मखसे नेपाःया हे म्हसीका खः तिसा खः । उकिं थनया भाषा, कला, संस्कृति, सम्पदा ल्यंकातयेगु उचित संरक्षण यायेगु नापं थनया मूर्त अमूर्त सांस्कृतिक व पुरातात्विक महत्वया सम्पदाया नं संरक्षण यानाः देगः, फल्चा, सतः, ल्वहंहिति, चुक,ननि, बहाःयात संरक्षण व आवश्यकताकथं मर्मत, पुनःनिर्माण यायेगु जुइ । भाषाया संरक्षण व विकासया निंतिं नं ज्याझ्वःत हयेगु जुइ ।

सम्बन्धित बुखँ

LEAVE YOUR COMMENTS