भाषाविद् डा. कमलप्रकाश मल्ल मन्त

येँ – भाषाविद्, त्रिभुवन विश्वविद्यालयया पुलांम्ह शिक्षाध्यक्ष प्राध्यापक डा. कमलप्रकाश मल्ल ८२ दँया उमेरय् शनिवाः बहनी मन्त । ताःई न्ह्यवनिसें पार्किन्सन ल्वचं कयाच्वंम्ह मल्ल म्हिगः २३ः५३ बजे अमेरिकाया एटलान्टाय् मदुगु खः । निवाः न्ह्यव इन्द्रियतय्सं ज्या मयायेवं वय्कःया अस्पताल भर्ना याःगु खः । आइसियुलय् तयाः उपचार याःसां स्वास्थ्य सुधार मवयेवं वय्कःयात अन्तिम इलय् एटलान्टाया हे स्थानीय पिस हबय् यंकूगु खः । वय्कः अन हे मदुगु खः ।

च्वसापासाया पुलांम्ह नायः भाजु मल्ल नेपालभाषा व अंग्रेजीया यानाः निगू दर्जनं मल्याक सफू च्वयादीगु दु । वय्कः आशा सफूकुथि गुथिया पुलांम्ह दांभरि लिसें नेपालभाषा खँग्वःधुकू कमिटीया नायः व मू सम्पादक नं खः । नेपालभाषाय् वय्कःया समालोचना व शोधग्रन्थ लेख नं यक्व हे पिदनाच्वंगु दु । वय्कःया हे सम्पादनय् नेपालभाषा–अंग्रेजीया ‘ए क्लासिकल नेवारी डिक्स्नरी’ पिहां वयेधुंकूगु दु । बेलायतया एडनबरा विश्वविद्यालयं भाषा विज्ञानय् विद्यावारिधी यानादीम्ह वय्कः त्रिभुवन विश्वविद्यालयया अंग्रेजी विभागया प्रमुख नं जुयादी धुंकूम्ह खः । वय्कःया हे सक्रियताय् अंग्रेजी विभाग अन्तर्गत भाषाविज्ञान नं अध्यापन सुरु जूगु खः ।

छुं ई न्ह्यव तक वय्कः क्यालिफोनिर्याया बर्कले विश्वविद्यालयय् आगन्तुक प्राध्यपक कथं सेवा यानाच्वनादीगु खः । वय्कलं जर्जियाया इमोरि विश्वविद्यालय अन्तर्गत तिब्बती बर्मेली भाषाया शब्दकोष दयेकेगुली नं ग्वाहालि यानादीगु खः । छुं ई न्ह्यव तिनि वय्कलं च्वयादीगु थीथी लेखत मुंकाः फर्म लिट्रेचर टु कल्चर नांया अंग्रेजी सफू नं पिदंगु खः । वय्कलं इतिहासविद् धनवज्र वज्राचार्यलिसे जानाः गोपालराज वं्रशावलीया व्याख्या व अंग्रेजी रुपान्तरन यानातःगु सफू नं पिथनादीगु दु ।

विद्यार्थी इलय् हे विद्यार्थी साहित्य मण्डल थेंज्याःगु संस्था चायेकाः ल्याय्म्हतय्त साहित्य सृजना यायेत प्रेरित यानादीम्ह वय्कः २००९ सालय् अखिल नेपाल विद्यार्थी फेडरेशनय् आवद्ध जुयाच्वनादीम्ह खः । थ्व हे इलय् वय्कःयात शान्ति सुरक्षा अन्र्गत ज्वनाः गुला तक बन्दी दयेकूगु खः । ने.सं. १०५८ (वि.सं. १९९३) सालय् लक्ष्मीपुजा कुन्हु बूम्ह वय्कःया जहान, छम्ह म्ह्याय् व छम्ह काय दु ।