
येँ – थुगु सिजनय् विश्वया दकलय् तजाःगु च्वापुगुँ सगरमाथाय् नं ‘ट्राफिक जाम’ जुइगु सम्भावना खने दुगु दु । छाय्धाःसां सगरमाथा गयेगु लागिं सरकारं थुगुसी कीर्तिमान हे कायम जुइ कथं पर्वतारोहीतय्त अनुमति बिउगु दु । पर्यटन मन्त्रालयं आः ३७५ म्ह आरोहीयात सगरमाथा गयेगु अनुमति बीधुंकूगु दु ।
अनुमतिया लागिं वयाच्वंगु मेगु छगू चाङ निवेदन मन्त्रालयय् थानाच्वंगु दनि । अर्थात थ्व ल्याखय् नं अझ मेपिं १० निसें १५ म्ह आरोहीत थुकी थपे जुइगु सम्भावना दनि । पर्वतारोहया इतिहासय् दकलय् अप्वः अनुमति बिउगु धइगु सन् २०१५ य् ३५१ म्हेसित खः । थुगुसी उगु कीर्तिमान नं पुला वंगु दु ।
आरोहीत यक्व दत धाःसा सगरमाथाय् ट्राफिक जाम जुयाः दुर्घटना जुइगु सम्भावना अप्वइगु खँ पर्वतारोहीतय्सं धाःगु दु । उकिं सुरक्षाया लागिं सुरक्षाकर्मी समेत थपे यानाः छ्वये मालीगु बारे बिचाः जुयाच्वंगु दु । छुं जुयाः सगरमाथा लागाय् छुं प्राकृतिक प्रकोप जुल धाःसा सीपिनि ल्याः नं अप्वइगु सम्भावना जुइफु ।
मेखे थ्वहे दँय् सगरमाथाया जाः नापे यायेगु लागिं नेपाल सरकारया छगू पुचः नं सगरमाथा च्वकापाखे वनीगु जूगु दु । थुगुसी नेपालं सगरमाथाया जाः थःपिंसं तुं नापे यायेगु धकाः छुं ई न्ह्यवंनिसें ज्या याना वयाच्वंगु खः । यदि सगरमाथाय् मनूतय् भीड यक्व जुल धाःसा सगरमाथाया जाः नापे याः वनीगु पुचःयात समेत असुविधा जुइ फइगु खँ नं धाःगु दु ।
यदि थुगुुसी अनुमति काःपिं यक्वस्यां सगरमाथा गल धाःसा च्वकाय् दकलय् अप्वः मनू थ्यंगुया कीर्तिमान नं कायम जुइ । चीनं उत्तरी मोहडां सगरमाथा गयेगुली यक्वसित अनुमति मबिउगु कारणं नं नेपाःपाखें गइपिं अप्वःगु खँ धाःगु दु ।
LEAVE YOUR COMMENTS