कोरोनां माधवनारायणया धलं प्रभावित

ख्व- दँय्दसं थें थुगुसी नं ख्वपया हनुमानघाटस्थित त्रिवेणीइ माघ लछियंकं च्वनीगु माधवनारायणया धलं दनेगु ज्या कोरोना संक्रमणया कारणं अस्तव्यस्त जूगु दु । थनया माधवनारायण धलं (व्रत) सेवा समितिं थुगुसी कोरोना संक्रमित जुइ धकाः सर्वसाधारण मनूतय्त धलं दने मबीगु निर्णय याःगु कारणं धलं दनीगु मेला हे अस्तव्यस्त जूवंगु खः ।

थुगुसी अन सुयातं नं धलं दने मबीगु तर परम्परा न्ह्याका तयेगु लागिं छुं मनूतय्त जक सुरक्षितपूर्वक धलं दने बीगु व्यवस्था सेवा समितिं याःगु खः । नापं अन भीडभाड नं याके मबीगु धकाः कडाइ याःसां न्हिंन्हिं सुथय् खुसिइ वयाः पुजा याइपिं व बाखं न्यनीपिं धाःसा वया हे च्वंगु दु ।

वंगु माघया पुन्हिनिसें ख्वपय् थें सक्वय् नं साली खुसिइ माधवनारायणया धलं दनेगु परम्परा दु । थुगुसी कोरोनां यानाः सक्वया माधवनारायण धलं नं प्रभावित जूगु दु ।

सक्वया माधवनारायण थें ख्वपया माधवनारायणया धलं नं पुलांगु व ऐतिहासिक महत्वं जाः । नेपाल संवत् ७२२ स जुजु रणजीत मल्ल थः हे धलं दनेगु लागिं अन थाय्या व्यवस्थापन याःगु खः धाइ । अभिलेखत स्वयेबलय् सक्वया माधवनारायण सिबें ख्वपया माधवनारायण धलं अझ पुलां धकाः नं स्थानीय मनूतय्सं दावी यायेगु याः । थनया त्रिवेणीघाटय् लुकुंबियाः एकचित्त जुयाः न्ह्यागु वरदान फ्वंसां पूवनी धइगु जनविश्वास दु ।

थन धलं दनीपिं मनूतय्सं खाली तुतिं हे न्यासि वनाः तीलमाधवंनिसें तलेजु भवानीया दर्शन याः वनेगु, सप्तमी कुन्हु पनौतीइ वनाः त्रिवेणीइ म्वःल्हुयाः इन्द्रेश्वर महाद्यःया दर्शन यासें अष्टमी कुन्हु लिहां वयेगु, दशमी कुन्हु पशुपतिइ वनाः म्वःल्हुयाः जयवागेश्वरीस्थित ताम्रेश्वर महाद्यःयाथाय् तक कलशयात्रा यायेगु, द्वादशी कुन्हु चाँगुनारायण वनाः म्वःल्हुयाः कलश ज्वनाः चाँगुनारायणया दर्शन यायेगु व माघ शुक्ल पुन्हि कुन्हु देय्चाःहिलाः भूपतिन्द्र मल्लया मूर्ति क्वय् ईन्द्रकलश छानाः लछियंकंया धलं क्वचायेकीगु परम्परा दुगु खँ व्रतालु विनोदकुमार प्रजापतिं कनादीगु दु । थुगुसी धाःसा कोरोनाया कारणं थज्याःगु छुं नं धार्मिक ज्याखँ मजुइगु जूगु दु ।