ने. सं. ११४४ कौलाथ्व तृतीया -

खुम्ह मिसा पत्रकारपिंत सम्मान

येँ (नेपालभाषा टाइम्स)- सछि व झिंप्यक्वःगु अन्तर्राष्ट्रिय नारी दिवसया लसताय् लाकाः नेवाः पत्रकार राष्ट्रिय दबुलिं खुम्ह मिसापिं पत्रकारतय्त साधना पत्रकारिता सम्मानपाखें हनेज्या याःगु दु । वंगु सोमवाः पर्यटन बोर्डय् जूगु छगू ज्याझ्वःया दथुइ मूपाहाँ स्वास्थ्य मन्त्री उपेन्द्र यादवं हनेज्या यानादीगु खः ।

ज्याझ्वलय् ख्वपया न्हापांम्ह मिसा फोटोपत्रकार सुनी बनेपाली, नेपाल समाचारपत्रया वरिष्ठ सहायक सम्पादक भगवती तिमल्सिना, नेपाल टेलिभिजनया पवनवर्षा शाह, गोरखापत्रया यलु जोशी, मेट्रो एफएमया रिता महर्जन व नयाँ पत्रिकाया शान्ति तामांगयात हंगु खः । वय्कःपिंत दबूया केन्द्रीय अध्यक्ष नृपेन्द्रलाल श्रेष्ठं स्वांमाः क्वखायेकाः, नेपाल आदिवासी जनजाति पत्रकार महासंघ (फोनिज)या वरिष्ठ उपाध्यक्ष अमरध्वज लामां खादां क्वखायेकूगु खःसा स्वास्थ्यमन्त्री यादवं हनापौ देछाःगु खः । ज्याझ्वलय् दबूपाखें पिकया वयाच्वंगु आज्जु बुलेटिनया मिसा पत्रकारिता विषेश ल्याःया विमोचन नं जूगु खः ।
ज्याझ्वलय् न्ववानादिसें मन्त्री यादवं संघीयताया सार्थक अभ्यासं जक मिस्तय् हक अधिकारसहित समावेशी शासन व्यवस्था अनुभुत यायेफुगु धारणा प्वंकादीगु खः ।

नेपाली जनतां आत्मसम्मान व सकसियागु पहिचानयात संवोधन यायेकथंया संघीयता मालाच्वंगु खः, तर आःया न्यागू विकास क्षेत्र थेंज्याःगु संघीयतां देय् व जनताया समस्या सहीढंगं संवोधन मजुइगु खँ नं वय्कलं धयादिल ।

जनजाति पत्रकार महासंघया उपाध्यक्ष लामां समावेशी पत्रकारितां जक विविध क्षेत्रया जनताया सः थ्वयेकेफइगु बिचाः तयादिल । अथेहे दबूया सल्लाहकार किरण शाक्यं नेपाःया न्हापाम्ह मिसा पत्रकार साधना प्रधानया योगदान व संघर्षयात लुमंकाः पत्रकार राष्ट्रिय दबुलिं मिसा पत्रकारपिंत सम्मान यानाः मिसा पत्रकारतय् विकासया निंतिं ज्या यानाच्वंगु खँ धयादिल ।