स्वयम्भूया झिंगुंगू सम्पदा जीर्णोद्धार

येँ – धार्मिक पर्यटकीय स्थल स्वयम्भूइ आःतक झिंगुंगू सम्पदा जीर्णोद्धार याये सिधःगु दु । स्वयम्भू व्यवस्थापन तथा संरक्षण महासमितिया कथं शान्ति पुखू न्ह्यःनेया चैत्य, वायुपुर, स्वयम्भू चैत्य न्ह्यःनेया गं, बसुन्धरा देगःया पौ, अनन्तपुर, प्रतापपुर, बहुमंगलद्वार चैत्य जीर्णोद्धार जूगु खः। स्वयम्भूइ थौंकन्हय् शान्तिपू पुनःनिर्माण यायेगु ज्या न्ह्यानाच्वंगु दु ।

स्वयम्भू लागा दुने लाःगु नीस्वंगू सम्पदा मध्ये अनन्तपुर व प्रतापपुर पुरातत्व विभागं जीर्णोद्धार याःगु खः । अथेहे बहुमंगलद्वार चैत्य महासमितिं युनेस्कोया ग्वाहालिं दयेकूगु खःसा मेमेगु सम्पदा महासमिति थीथी दातृ निकायया ग्वाहालि व आन्तरिक स्रोतं जीर्णोद्धार याःगु खः । आः दयेकाच्वंगु शान्तिपू महासमितिया हे खर्चं दयेकाच्वनागु खँ महासमितिया महासचिव महेन्द्ररत्न बुद्धाचार्यं राससयात कनादीगु दु । शान्तिपू प्यंगू करोड तकाया लागतं निदँ न्ह्यवंनिसें दयेके ज्या न्ह्याःगु खः । शान्तिपू दुने दयेकेज्या देखा कयातःपिं दँकःमि सिँकःमितय्सं जक यायेमाःगुलिं लिबानाच्वंगु खँ धाःगु दु ।

शान्तिपू दुनेया गोप्य क्वथा दयेकेगु ज्या यायेत आः न्याम्ह देखा कयातःपिं दँकःमि लुइधुंकूगु खँ वय्कलं कनादिल । यलय् च्वंपिं थुपिं दँकःमितय्सं गुह्य पुजा यानाः गोप्य क्वथा दयेकेज्या याइ । महासमितिया कथं २०७२सालय् वःगु तःभुखाचं क्षति जूगु स्वयम्भूया सम्पदा पुनःनिर्माणया निंतिं जक महासमितिं न्यागू करोड दां खर्च यायेधुंकूगु दु । धमाधम पुनःनिर्माण जूगुलिं पर्यटकत नं अप्वयाच्वंगु दु ।

सम्बन्धित बुखँ

LEAVE YOUR COMMENTS