लिभरपुल त्यात, बार्यन बराबरीइ
एजेन्सी- युइएफए च्याम्पियन्स लिग अन्तर्गत बुधवाः चान्हय् जूगु कासाय् लिभरपुल त्याःगु दु । अन्तिम १६ या न्हापांगु लेगय् लिभरपुलं घरेलु टिम इन्टर मिलानयात २–० गोलं बुकूगु खः ।
कासाया निगूगु हाफय् रोबर्टो पिरमिनो व मोहम्मद सलाहं लिभरपुलया निंतिं गोल याःगु खः । अवे मैदानय् बांलाःगु अन्तरं कासा त्याकाः लिभरपुलं क्वार्टरफाइनलया सम्भवनायात बल्लाकूगु दु । थ्व कासाय् लिभरपुलपाखें म्हितूम्ह हार्भे इलियट च्याम्पियन्स लिग म्हितूम्ह दकलय् क्वकालिम्ह कासामि जूगु दु । म्हिगः कासा म्हितूबलय् इलियट १८ दँ व ३१८ न्हि दुगु खः ।
लिगया मेगु कासाय् बार्यन म्युनिखं साल्सवर्गलिसे छगू छगू गोलया बराबरी म्हितूगु दु । कासाय् घरेलु टिम साल्सवर्गया चुकवुबुइके एडमुं गोल यानाः टिमयात अग्रता बिउगु खःसा बार्यन म्युनिखया निंतिं ९० औं मिनेटय् किंग्स कोम्यानं गोल यानाः कासा बराबरीइ हःगु खः ।
LEAVE YOUR COMMENTS